BIHAIN long 15 krismas Konstitusenel Lo Rifom Komisin (CLRC) i opim nupela Polisi bilong en long Infomesen Komyunikesen Teknoloji (ICT) na wanpela opisal websait long Mande dispela wik.

Siaman bilong CLRC na Memba bilong Is Sepik provins, Kevin Isifu i tok em i amamas tru bikos dispela i soim olsem CLRC i lusim taim bipo na nau em i stap long dijital taim.

“CLRC i mas muv i go insait long dijital kalsa we infomesen i mas redi na stap long pablik i ken lukim na kisim na i no hait insait long opis we pablik i no inap save.

“Dispela disisen mipela i mekim long kamapim na opim ICT em i bikpela samting long wok bilong mipela long i go het yet namel long salens bilong COVID-19 we mipela i tambu long pas wantaim narapela,” Kevin Isifu i tok.

Em i tok ICT Polisi na websait em i wanpela bilong ol namba wan samting we CLRC Kopret Plen 2020 i go long 2024 i laik kamapim long bringim ol fesiliti na wok proses bilong en i go long narapela mak wankain olsem ol arapela ogenaisesen long sosaiti na tu long stap insait long wok bilong gavman long wok bilong mekim ol samting i kamap moden.

ICT polisi bilong CLRC i bai helpim long yusim na strongim ICT gut na tu stretim ol hevi bilong kisim infomesen long CLRC.

“Wantaim dispela polisi, ol lain husat i laik yusim ol ICT fesiliti bilong mipela bai kisim ol infomesen long wanem ol i mas mekim na bihainim taim ol i yusim.

“Na long nupela websait bilong mipela, olgeta ripot bilong mipela kain olsem ripot bilong ileksen na trensfea na ol arapela ripot, lo, monograp, diskasen pepa na ol arapela pepa bai stap long websait bilong mipela na ol pablik long kantri na ovasis i ken kisim na lukim.

“Bikos CLRC i save kamapim lo na i nidim tingting na infomesen bilong pablik, dispela websait i givim gutpela spes long ol manmeri na ol ogenaisesen husat i gat laik long stap insait long proses bilong kamapim lo,” Mista Isifu i tok.

Mista Isifu i strongim pablik long i go lukim dispela websait na luksave gut long CLRC na toktok wantaim ol.

Rebecca Negere i raitim