PAPUA Niugini i mekim las gutbai i go long Papa kantri, Great Grand Chief Sir Michael Somare.

Ol i planim bodi bilong Sir Michael long haus bilong em long Kreer Heights long Wewak, i Sepik Provins.

Dispela em bihain long bikpela lotu long Sir Michael Thomas Somare Stedium, Prince Charles Oval.

Kardinal Sir John Ribat i pas long lotu.

Stap tu long lukim na soim las rispekt bilong ol em Praim Minista James Marape wantaim sampela ol memba bilong palamen, Gavana Jeneral Sir Bod Dadae, Sif Jastis Sir Gibbs Salika, ol lida bilong Katolik na ol arapela sios na planti tausen manmeri.

Tasol pastaim long dispela, stat long las wik Fonde yet we em i namba wan taim gavman i kisim bodi bilong wanpela man i go long Palamen Haus long Pot Mosbi long Fonde,

Em i namba wan taim tu long lukim Gavana Jenerel Sir Bob Dadae na Sif Jastis Sir Gibbs Salika i stap insait long Semba we ol Memba bilong Palamen tasol i save go insait.

I no gat kain samting i bin kamap na ating bai i nogat kain samting i kamap gen long bihain taim.

Ol i mekim olsem long givm taim long ol Memba bilong Palamen i tokaut long tok sori bilong ol.

Dispela pasin i bin wankain long Is Sepik Provins Asembli we bodi bilong Sir Michael i stap insait long provinsal haus ov asembli.

Long Sande Praim Minista i ritim aut tu tok sori bilong Prince Charles long Inglen bihain long em i givim bodi bilong Gren Sif Sir Michael i go bek long pipel bilong Sepik.

Prince Charles i tok em i bin kam long Papua Niugini namba wan taim long 1966 na i bin kam bek makim Kwin Elizabeth long 1975 taim Papua Niugini I kisim Independens. Em i tok em i save wanem kain draipela wok Sir Michael i mekim long ol yia i go pas long dispela kantri i kisim independens.

Long Fraide i bin gat bikpela lotu long Sir Hubert Murray Stedium long Pot Mosbi.

Mausman bilong ol arapela kantri tu i bin kamap long soim las rispekt bilong ol.

Dispela las gutbai i pinisim tu tupela wik bilong Haus Krai em gavman i bin makim long stap long sori bilong dai bilong Great Grand Chief Sir Michael.

Sir Michael i bin dai long Pancreatic Cancer long Pot Mosbi long 26 Februeri, 2021.

Paul Zuvani i raitim