FAIVPELA nupela dai i kamap long COVID-19 i apim namba bilong COVID-19 dai i go 26 long kantri, ripot i kam long opis bilong Nesenel  COVID-19 Pandemik Kontrola, David Manning i no long taim i go pinis.

Ol dispela 5-pela dai i kamap long Nesenel Kepital Distrik (NCD). Tripela em ol meri na krismas bilong ol em  25, 45, na 71. Tupela man i dai em krismas bilong tupela i 64 na 74. Tupela bilong ol dispela faivpela dai i bin yusim tub o raba long pulim win inap ol i dai.

Na long Mande, ripot i soim 82 nupela COVID-19 keis. Dispela i apim namba bilong COVID-19 keis i go 2,351.

Long dispela 82 keis, 51 i kam long NCD, 13 i kam long Simbu, 9-pela long Enga, 2-pela long Hela na 6-pela long Morobe.

Kontrola na Polis Komisina David Manning i singaut long olgeta manmeri na pikinini long kantri long lukautim gut helt bilong ol.

“Sampela lain i gat vaires bilong COVID-19 tasol ol yet tu i no save olsem ol i gat na sampela ol i gat em bai luk olsem kus sik yumi save kisim long en,” Kontrola David Manning i tok.

Em i tok ol sain bilong COVID-19 em kus, skin hat, het pen, sot win, sua long nek, skin guria, hat long testim na smelim kaikai, na masol pen. Sapos wanpela i soim wanpela bilong ol dispela sain, em i mas i go kisim test.