MOA long 20 tausen man, meri na pikinini i kamap long Sir Hubert Murray Stedium long Konedobu, Pot Mosbi long Fraide Mas 12, 2021 long stap insait long bikpela Misa bilong Indai bilong Gren Sif Sir Michael Thomas Somare.

Kardinel Sir John Ribat, Asbisop bilong Pot Mosbi Katolik Daiosis na Santu Joseph Katolik Perish long Pot Mosbi i go pas long dispela Misa. Hettok bilong dispela Misa em ‘Wan Kantri, Wan Pipel bilong God.’

Dispela Misa long dispela stediumem i makim stori bilong Gren Sif Sir Michael husat i bin daunim plak bilong Australia long independens de Septemba 16, 1975 na apim nupela plak bilong Papua Niugini namba wan taim.

Nau em i dai gavman i luksave long dispela histori na i holim dispela bikpela Misa long dispela stedium long givim bikpela tenkyu.

Ol PMV bas i stop wok long soim rispek tasol dispela i no pasim ol pipel long kamap long stedium long Konedobu.

Tupela yangpela meri Enga i tok, “Mipela wokabaut long Morata yet long 6 klok moning na kamap long hia. Mipela kam long tok gutbai long dispela man husat i bringim fridom bilong mipela.”

Em i wanpela hatpela taim bilong holim kain Misa long wanem sik COVID-19 i stap na gavman i putim tu ol kontrol bilong was long dispela sik.

Tasol ol pipel i no tingim dispela. Ol i laik stap insait na lukim lida bilong ol wanpela moa taim. Ol i sanap long ol geit na pusim geit taim ol sekyuriti i tok stedium i pulap pinis.

Wanpela man husat i sindaun long gren sten pinis i tok, “Larim ol i kam insait. Em papa bilong ol tu.”

Long rot stat long fiunerel hom (ples bilong lukautim bodi bilong ol i indai pinis) long Erima ol pipel i sanap na wetim kasket i kam i go long Sir Hubert Murray stedium long Konedobu na i go bek long fiunerel hom.

Wanpela i tok, “Mipela i tingim sik COVID-19 olsem na maski mipela i wet tasol long rot na lukim em wanpela moa taim.”

Dispela Misa i pinis wantaim draipela ren na Praim Minista James Marape na ol arapela lida i sanap waswas long ren na lukim kasket i wantaim bodi bilong Gren Sif Sir Michael Somare i go bek long fiunerel hom.

Rosa Koian i raitim