PIPEL bilong Is Nu Briten i luksave long Gren Sif Sir Michael Thomas Palangat Somare olsem em i wanpela pikinini bilong ol taim em i lusim laip bilong long 26 de long mun Februeri, 2021.

Dispela luksave na sori na war i stap long pipel bilong Is Nu Briten na Provinsel Ekseketiv kaunsel bilong ol i kam bung long wanpela miting long las wik Sarere na tok oraitim mani mak olsem K250,000.00 long haus krai bilong Gren Sif Se Michael Thomas Palangat Somare.

Gavana bilong Is Nu Briten Nakikus Konga i tokaut olsem haus krai i gat tupela hap bilong em. Namba wan hap bilong em mipela bai mekim long Ralum So Graun. Namba tu hap bilong bai ol i mekim long neks yia. Em i tok olsem mipela bai makim deit bilong mekim dispela haus krai.

Konga i tok provinsel ekseketiv i tok orait long mani mak olsem K150,000.00 bai ol i yusim long namba wan hap bilong haus krai na namba tu hap bilong en ol i katim mani mak olsem K100,000.00

Is Nu Briten provinsel gavman bai salim toksave long famili bilong Sir Michael long kam long namba tu hap bilong en. Long dispela taim bai ol i mekim Tolai Kalsa ol i kolim Kutu Tabu Konga i tok.

Konga i tok ol bai mekim Tolai Kalsa bikos Sir Michael, mama i karim em long Rapidik na ol pipel bilong Bitapabeke i kisim em i go insait long wanpisin bilong ol. Ol i respektim Sir Michael olsem wanpela Tolai man na lidaman bilong dispela kantri.

Em i tok ol Tolai pipel i save olsem Sir Michael em i wanpela pikinini bilong ol.

Michael Novingu i raitim