Ol manmeri na pikinini long ples stap arere long wara Kemp Welch long Sentral Provins i painim hat tru long yusim dispela wara bihain long ol i lukim ol dai pis long wara long Februari 12 long dispela yia.

Dispela i bin kamap bihainim wanpela polusen i kamap long wara na bagarapim wara na ol enimal i stap insait long wara. Ol pipel i kisim bikpela taim tru bikos dispela wara em i bikpela samting long laip bilong ol.

Tasol nogat wanpela man i save wanem samting i bagarapim wara Kemp Welch. Ol gavman i bin i go na mekim wokpainimaut tasol ol i no bin toksave long risal bilong dispela wokpainim bilong ol.

Ol manmeri na pikinini i wet longpela taim tru long bekim bilong gavman na ol i kisim bikpela taim.

 Ol manmeri long ples Kalo i stap arere long wara Kemp Welch i singaut long Konsevesen na Envaironmen Proteksen Atoriti (CEPA) na Sentral Provins Atoriti long givim ol risal bilong wokpainim kwiktaim na i no ken westim moa taim.

“Mipela i singaut long ol disasta na helt atoriti bilong Sentral Provins Edministresen long toksave gut long mipela bilong wanem na yupela i westim longpela taim tru long toksave long mipela long ol wokpainim bilong yupela bikos mipela i wetim yupela tasol i stap na mipela i no yusim wara na nau mipela i kisim bikpela taim tru,”Siaman bilong Kalo Natuna Disasta Rilif Komiti (KNDRC), Iamo Geno Gapi i tok.

Ol komyuniti i makim KNDRC long i go pas long helpim ol manmeri long ples husat i no inap long yusim wara long dring, was was na kisim pis.

“Komyuniti bilong mipela i save lukluk long dispela wara long inapim laik bilong mipela. Ol tumbuna bilong mipela i mekim long en mipela tu i nau mekim wankain. Tasol dispela bagarap i kamap long wara i bagarapim laip bilong mipela na ol gavman ejensi i stap long helpim mipela i no mekim gut wok bilong ol na ol i no toksave tu long mipela long wanem as na dispela wara Welch Kemp i bagarap,” KNDRC Siaman Gapi i tok.

Gapi i tok KNDRC i bin toktok wantaim Nesenel Dipatmen bilong Helt na Sentral Provins Helt Atoriti na Nesenel Disasta na Imejensi Sevis bihain long ol i kisim toksave olsem ol risal bilong wara polusen i stap long han bilong Sentral Provins Atoriti long toksave long pablik.

“Mipela i laik bung wantaim Sentral Provins Atoriti na luksave long risal bilong dispela wokpainim na mipela i ken toksave long ol pipel long komyuniti na ol i ken sindaun isi,” Gapi i tok.