PASIN bilong Gren Sif Sir Michael Thomas Palangat Somare i gutpela na tu laip bilong em long wok politik i soim stret olsem em gutpela lidaman.

Tude ol yangpela lidaman na lidameri i mas bihainim na kisim kantri i go het.

Asbisop Rochus Tatamai bilong Rabaul Katolik Asdaiosis i tok ol lidaman i mas putim tingting na wok bilong ol long ol pipel bilong PNG pastaim olsem Sir Michael i mekim.

Bisop Tatamai i tok Sir Michael i soim gutpela piksa long wok bilong em pinis. Moa yet em i tok, Sir Michael i laik lukim divelopmen o wok kamap i mas kamap long foapela rijon bilong dispela kantri bai kirapim gutpela sindaun bilong ol pipel long ol komyuniti bilong ol.

Maski, ol pipel bilong Sir Michael long Is Sepik i tok ol i no kisim Gavman sevis, tasol Sir Michael i wok hat yet long developim dispela kantri, asbisop Tatamai i tok.

Em i tok Sir Michael i soim gutpela pasin long tingim ol pipel pastaim long kisim sevis i go long ol.

“Ol yanpla lidaman na lidameri tude i mas bihainim lekmak bilong Sir Michael long wokim wok bilong ol wantaim trupela and stretpela pasin long givim sevis long ol pipel bilong dispela kantri.

Wokim na stretim ol skul, haus sik, rot na bris, kisim wok binis i kam long kantri, em ol bikpela wok Sir Michael  i mekim long kisim sevis i go long ol pipel.

Asbisop Tatamai i tok em i laikim pasin bilong ol lidaman i wok politik wantaim Sir Michael olsem ol lida olsem Mathias Toliman, Oscar Tamur, na ol arapela lidaman long Is Nu Briten na kantri wantaim i mas bihainim na ol i mas stap long daunpasin.

Michael Novingu i raitim