Australia i amamas long Gren Sif Sir Michael Somare long kamap fren na patna bilong ol.

Hai Komisina bilong Australia long Papua Niugini, John Philp i makim maus bilong ol pipel bilong Australia na i go stap long Stet Funeral o lotu bilong tingim Gren Sif Sir Michael Somare long Sir Hubert Murray Stedium long Pot Mosbi long las wik Fraide.

Long wankain taim, Australia i daunim plak bilong ol long Haus Palamen bilong ol long Canberra i go daun long hap mak. Wankain i kamap long olgeta plak long ol gavman dipatmen long Australia. Ol i mekim dispela long soim krai na rispekt bilong ol long Gren Sif Sir Michael.

Na long Mande, Palamen bilong ol i kirap na soim rispekt na sori bilong ol bipo long ol i pasim kibung bilong ol.

Australia i givim tupela balus bilong Australia Royal Airforce long PNG long Sande, Mas 14, 2021 long helpim kantri long dipatsa na gutbai bilong Gren Sif Sir Michael Somare long Jackson Ples Balus long Pot Mosbi i go long Boram Ples Balus long Is Sepik Provins.

“Australia i amamas tru long sapotim Papua Niugini long i go na gutbai bilong Gren Sif Sir Michael Somare long Pot Mosbi i go long ples bilong en long malolo long Is Sepik Provins. Royal Australian Air Force C27 i karim kar bilong karim kasket, ol famili bilong Sir Michael na ol bikmanmeri na i lusim ples balus long Pot Mobsi Jackson na i go long Boram Ples Balus long Is Sepik Provins,” Foriegn Minista bilong Australia, Marisa Payne i tok.

Kenol James Kidd, Defens Fos Edvaisa bilong Australia husat i ranim tripela yia bilong en olsem Difens Fos Edvaisa bilong Australia long Papua Niugini i go pas long stretim dispela tupela Australian Royal Airforce o balus bilong Australia long helpim PNG long karim kasket bilong Sir Michael, kar bilong karim kasket na ol bikmanmeri na famili bilong Gren Sif Sir Michael.

Australia i save pas gut tru wantaim PNG na i save stap klostu olgeta taim long helpim kantri.

“Sir Michael em i longpela taim fren bilong Australia na mipela i save rispektim em olsem famili bilong mipela,” Praim Minista bilong Australia Scott Morrison i tok.

“Papua Niugini i stap klostu long mipela Australia na em i famili bilong mipela. Mipela i pas tru wantaim ol bipo yet long Kokoda, Pot Mosbi na Milin Be na ol i save tingim mipela long Lae, Rabaul na Bomana.

“Na tu ol kiap bilong mipela, ol yangpela man long Australia i save wokabaut raun long ol bikpela maunten bilong PNG na wok insait long ol lokal viles na komyuniti. Bikos, long dispela taim PNG em i wanpela koloni bilong Australia na mipela i bin pait wantaim Germany long wol woa 2 long lukautim PNG,” Praim Minista bilong Australia Morrison i tok.

Rebecca Negere i raitim