PLANTI tausen manmeri i kamap long welkamim bodi bilong Gren Sir Sir Michael Somare long Wewak, Is Sepik Provins long Sande Mas 13, 2021.

Ol manmeri maski ol i yangpela o lapun i rabim graun, blakpela klos, holim PNG plak na Is Sepik Provins plak na sanap long rot stat long Boram Ples Balus na i go olgeta long Sir Michael Thomas Somare Stedium, Prince Charles oval long Caltex.

Ol skul pikinini i putim ol skul yunifom bilong ol long makim skul bilong ol na soim sori.

Planti manmeri i tok ol i kamap long ples balus long 7 klok moning yet bikos ol i ting balus i karim bodi bilong Gren Sif Sir Michael bai kamap long 8 klok moning.

Tasol i no bin kamap inap long Australia Ami balus i kisim bodi bilong Sir Michael na kamap long 4 klok long apinun,

Dispela i soim tru olsem Sir Michael i sif na i namba wan man bilong ol pipel bilong Sepik pastaim na bihain Papua Niugini.

Ol Sepik pipel i sapotim na holim tru Sir Michael long bel na lewa bilong ol long wok politik inap long 49 krismas olgeta, kain mak we i no gat wanpela lida long Pasifik o long ol Komonwel kantri i bin gat long em na inap long kamap long em long ol yia i kam bihain.

Sir Michael i wok politik inap long taim em i ritaia long 2017.

Is Sepik na Wes Sepik manmeri wantaim i kamap long tok welkam long bodi bilong Sir Michael.

Dispela em ol manmeri bilong Wewak taun tasol.

Tasol taun i bin inap long pas tru long muv sapos olgeta manmeri long ol distrik long provins i kamap na lukim.

Is Sepik Provinsal Edministresen i bin askim ol manmeri long stap bek long distrik bilong ol yet na lukim long televisen.

Em i askim olsem bikos long kamap bilong sik coronavirus (COVID-19).

Paul Zuvani i raitim