WANPELA bikpela asua i kamap long Jacksons ples balus long Pot Mosbi long Sande Mas 13, 2021 taim opis bilong Praim Minista i senisim balus bilong karim kasket wantaim bodi bilong Gren Sif Sir Michael i go bek long ples long Wewak, Is Sepik Provins.

Ol pipel husat i sanap lukluk long tok gutbai long dispela laspela taim i no amamas taim Air Niugini balus Q400 i putim kasket bilong Gren Sif Sir Michael long ples bilong karim kago long balus.

Ol i singaut na tok, “Em i no kago. Putim em long kebin wantaim famili.”

Kwiktaim gavman i salim tok long C27, ami balus bilong Australia husat i ran i go pinis long Wewak long kam bek na karim Sir Michael.

Taim C27 i kam bek bihain long 30 minit samting, ol wokmanmeri bilong ples balus i rausim kasket bilong Sir Michael long Air Niugini balus na putim i go insait long en na Australia ami balus C27 i karim em i go.

Ledi Veronica na ol famili bilong Sir Michael i go bek insait long Q400 wantaim Praim Minista James Marape na meri bilong em, NCD Gavana Powes Parkop na ol arapela lida na ol i bihainim papa.

Gren Sif Sir Michael i lusim Pot Mosbi long 1:15pm na go bek long ples bilong em long malolo.

Gavman bilong Australia i bin salim tupela ami balus bilong em Royal Australia Air Force (RAAF) long helpim long karim bodi bilong Sir Michael i go bek long ples. Wanpela i karim kar bilong karim kasket wantaim bodi bilong Sir Michael na narapela i karim Sir Michael.

Rosa Koian i raitim