INSAIT long stori bilong em long papa bilong em Dulciana Somare Brash i tokaut olsem papa bilong em i bin lusim sik bet bilong em long 2012 long Singapore long kam bek long banisim konstitusen.

Em i tok taim em i mekim olsem em i no laik pait long stap long pawa. Em i larim.

“Long save long wanem taim bilong stopim hevi long kamap em i no lus, em i lidasip,” Dulciana i tok.

Dulciana i tok papa bilong em i save rispektim proses olsem na em i larim ol samting i kamap bihainim proses. Dispela ol samting i bin kamap taim Belden Namah, nau oposisen lida na Peter O’Neil memba bilong Ialibu-Pangia i bin rausim Gren Sif Sir Michael long sia bilong Praim Minista na i no bihain lo stret.

Bihain man husat i bin wok wantaim Gren Sif Sir Michael Somare,  Dokta John Momis i stori long ol wok ol i bin mekim long kamapim konstitusen bilong Papua Niugini.

Em i tok, “Somare em i siaman bilong konstitusen plenning komiti na em makim mi deputi bilong em long Konstitusen Plening Komiti.”

Dokta Momis i tok, “Planti i tok mipela i go long ol ovasis ples na kopi long konstitusen bilong ol. Nogat tru. Mipela i stap tasol long hia na mipela i go long ol ples na toktok wantaim ol na harim tingting bilongol na bihain mipela i raitim konstitusen.

“Em i wanpela narakain konstitusen tru long wol na em i kamap long Papua Niugini yet,” Dokta Momis i tok.

I bin i gat planti pipel i helpim long dispela wok bilong kamapim konstitusen o mama lo bilong kantri.

 Rosa Koian i raitim