LONG dispela taim we namba bilong COVID-19 i wok long go antap kwiktaim tru long Papua Niugini, ol go pas lain i makim ol bisnis haus, praivet sekta na ol divelopmen patna i askim olgeta memba long sanap ples klia na go pas long soim pasin bilong bihainim ol lo na oda bilong COVID-19.

Papua Niugini Chamber ov Commerce na Industry (PNGCCI) na Bisnis Council ov PNG (BCPNG) i toksave long ol bisnis haus long olgeta taim bihainim “Niupela pasin” streteji long ol wok ples.

Ol niupela pasin streteji em;

1. Sapos yu sik, stap long haus. Noken go long wok. Noken stap pas pas wantaim ol arapela.
2. Sapos yu skin hat, kus, nek pen o hat long pulim win, ringim COVID-19 hotlain 1-800 200.
3. Givim spes olsem 1.5 mita namel long yu yet, ol wanwok na klaen.
4. No ken sekhan wantaim ol arapela. Tok helo, smail na tanim het tasol.
5. Klinim opis olgeta taim, moa yet ol dua, telefon, kibot, baten bilong eleveta, haus kuk na toilet.
6. Wasim han olgeta taim wantaim sop o yusim senitaisa.
7. Kus i go long skru bilong han o yusim tisu na tromoi kwiktaim i go long rabis bin.
8. No ken bung bung tumas long opis wantaim ol wanwok.
9. Werim mas olgeta taim bilong lukautim yu yet na ol arapela.
10. Sapos yu gat hevi wantaim helt bilong yu, lukim dokta kwiktaim na kisim edvais long rot bilong lukautim yu yet gut.

Ol dispela nau i mas kamap nomol pasin bilong wan wan manmeri.

PNGCCI na BCPNG i luksave na tok tenkyu long wok gavman i mekim long daunim hevi bilong COVID-19 long PNG.

Carolyne Ketsimur i raitim