GAVANA bilong NCD Powes Parkop i tokim Wantok Niuspepa long nupela plen bilong Gordons bas stop long Pot Mosbi bihain long ol i bin kisim tok orait long Komisina bilong Polis long yusim tupela hekta bilong Gordons polis Bareks graun long wokim gutpela bas na teksi teminol.

Long dispela taim em i no kamap yet bikos long tupela risen; wanpela em ol i laikim 3-pela hekta graun olsem na dispela i toktok yet wantaim Polis Kominsina na Polis Minista. Na namba tu em ol i nid long stretim olgeta 30 famili husat i slip kirap long dispela hap eria pastim long statim konstraksen.

“Taim mipela i stretim dispela olgeta samting bai mipela statim dispela konstraksen olsem na mipela i laik bilding dispela kain bas stop bikos Gordons em senta bilong siti,” em i tok.

“Olgeta bas i save kam long dispela hap bikos planti manmeri i save go kam long dispela hap, tasol nau mipela i stat plenim. Mi ting em bai kamap hariap long helpim ol pipel bilong siti,” Parkop i tok.

“Mipela i plen tu long Manu bas stop bikos olgeta bas i save pasim rot long kisim ol manmeri.

“Rot Trefik Atoriti na Trefik polis i mas katim daun ol PMV’s i save raun nating na pasim rot bilong ol bas long kisim manmeri bikos NCD opis i no gat rait long stopim dispela samting,” Gavana Parkop i tok.

Nau yet i no gat gutpela bas stop long Gordons bilong ol pipel na ol i yusim Unagi Oval olsem bas stop.

Jacklyn Kimala i raitim