TAIM kantri i stap long malolo na rispektim Stet Funeral o lotu bilong tingim dai bilong Gren Sif Sir Michael Somare long las wik Fraide, bikpela namba bilong ol manmeri long ol ples arere long Zenag, Patep na Parakris i kisim dispela sans long pait wantaim ol wokmanmeri bilong Zenag Chicken Fam long Bulolo Distrik na stilim ol samting bilong ol long fam.

Planti operesen bilong Zenag Chicken i bin pas long dispela taim long rispektim Gren Sif Sir Michael taim ol dispela memba bilong ol komyuniti i kam bagarapim fam na stilim ol samting.

Zenag Chicken i mekim wokpainimaut yet long hamas samting i lus na wanem ol bagarap i bin kamap.

Ol liklik bisnis long kantri bai kisim taim bikos ol dispela ples lain i bin bagarapim ol fam we Zenag Chicken i save kamapim na lukautim ol bebi kakaruk. Ol liklik bisnis bai wet longpela taim ken long kisim bebi kakaruk bilong ol.

Zenag Chicken i tok pasin ol dispela ples manmeri i mekim long ol gutpela wokmanmeri bilong ol na ol ol propeti bilong ol i no gutpela tru. Ol i pilim pen moa bikos dispela pasin i kamap taim olgeta manmeri na pikinini long kantri i stap isi na tingim dai bilong Gren Sif Sir Michael.

Na narapela samting tu we i mekim Zenag Chicken i pilim pen moa em olsem dispela ol manmeri husat i kamapim bagarap long ol em ol manmeri long komyuniti we ol yet i save long ol.

I no long taim i go pinis, Zenag i bin givim ol sia, desk, na ol buk long ol skul insait long Bulolo Distrik. Ol i pilim nogut tru olsem planti ol manmeri long ol dispela komyuniti we ol i bin helpim i soim amamas bilong ol long Zenag long kain pasin nogut. 

Zenag tokaut olsem ol i amamas long polis long putim bek oda. Ol polis i bin soim strong na profesenelisim bilong ol long kain hevi olsem.

Zenag i gat ol vidio bilong ol atek we i kamap, bai ol i wok klostu wantaim polis na holim ol dispela raskol na putim long han bilong lo.