Ol memba bilong ol tripela disaplineri fos long Papua Niugini, Royal Papua Niugini Konstabulari (RPNGC), Papua Niugini Difens Fos (PNGDF) na Koreksenel Sevis Institut ov Papua Niugini (CIS PNG)  i mekim gut wok bilong ol long kamapim oda na bel isi insait long Nesenel Haus Krai long Sir John Guise Stedium na Stet Funeral long Sir Hubert Murray Stedium na long Wewak.

Long Sir John Guise Stedium, ol polis i putim was long insait na ausait bilong Nesenel Haus Krai long tupela wik. Ol manmeri long Pot Mosbi i pilim seif long kam soim sori na rispekt bilong ol long Gren Sif Sir Michael.

Na long Sir Hubert Murray long Stet Funeral, ol tripela disaplineri fos wantaim i stap klostu long kasket bilong Gren Sif Sir Michael Somare na kar bilong karim kasket maski san i hot tumas o ren i pundaun.

Ol i sanap strong yet maski ren o san, long inapim tok promis bilong ol long sevim na lukautim ol pipel bilong Papua Niugini na tu long givim rispekt i go long Gren Sir Michael.

Long las wik Fraide, long Hubert Murray Stedium long Stet Funeral o lotu bilong tingim Gren Sif Sir Michael, san i bin hat tru. Na long pinis bilong lotu bihain long ol memba bilong ol Disaplineri Fos i apim kasket bilong Gren Sif Sir Michael na putim go insait long kar bilong kasket, bikpela ren i bin pundaun. Tasol ol i no surik. Ol i sanap strong yet na mekim wok bilong ol wantaim rispekt. Ol i no komplen o ranawe i go painim ples hait tu. Nogat.

Ol i go het long mekim wokmak bilong ol long inapim tok promis bilong ol taim ol i karim Gren Sif  Sir Michael i go long Is Sepik Provins na putim em long matmat bilong en long Wewak long Tunde, Mas 16, 2021.

Rebecca Negere i raitim