BRYAN Kramer, Minista bilong Jastis na Memba bilong Madang i bin kisim COVID-19 i no long taim i go pinis.

Long hamas tausen manmeri na pikinini husat i bin kisim COVID-19 long kantri, nogat wanpela i kam ples klia long pablik na stori long ol ekspiriens bilong ol long taim ol i sik long COVID-19. Tasol Jastis Minista Bryan Kramer i tokaut long pablik long ekspiriens bilong en wantaim sik COVID-19 na em i strongim pablik long lukautim ol yet.

Em i tok bihain long em i bin harim olsem ol test risal bilong ol wanwok bilong en i soim olsem ol i gat COVID-19 na tu ol keis bilong COVID-19 long kantri i go antap tru em yet i go na putim han long kisim test.

“Long avinun bilong dispela de mi bin i go kisim test, mi kisim wanpela toksave olsem mi gat COVID-19. Kwiktaim tru mi go hait insait long haus na haitim mi yet,” Jastis Minista Kramer i tok.

“Long taim we mi bin i go na kisim test, mi no bin soim ol sain bilong COVID-19. Tasol long neks moning, ol sain bilong kus i wok long kamap long skin bilong mi. Mi kirap long moning na pilim olsem het bilong mi i spin liklik na long belo mi pilim liklik het pen na skin hat. Long avinun, ol sain i go bikpela na mi stat long kus strongpela tru na ol masol bilong mi i pen.

“Ol dispela hetpen na masol pen i bin i go bikpela long de namba 3. Tasol long de namba 4 ol dispela masol na hetpen i stat long i go daun,” Minista Kramer i tok.

Em i tokaut olsem wanpela samting we em i no pilim gut long en taim em i sik wantaim COVID-19 em baksait pen na het pen we i mekim em i painim hat tru long slip.

Tasol em i tok, “Em i gutpela tru olsem COVID-19 sik bilong mi em i liklik na i no strongpela o bikpela sik tumas long bai mi go slip long haus sik. Planti ol wan wok bilong mi ol Memba bilong Palamen i bin kisim bikpela taim tru, sampela bilong ol i slip long haus sik na sampela i go stap long Intensiv Kea Yunit (ICU) long planti wik.”

Minista Kramer i tok, strong bilong bodi em i bikpela samting long dispela we i no gat marasin bilong COVID-19.

“Taim mipela kisim COVID-19, mipela bai i orait gen o nogat, mipela i bai go slip long haus sik o dai em stap long han bilong strong bilong bodi bilong wan wan manmeri na pikinini,” Minista Kramer i tok.

Em i tok i gat planti tingting long ol paul toktok na ol toktok bilong sem i kam long pablik long bagarapim ol lain husat i kisim COVID-19.

“Yes, yu ken kisim bikpela sik tru na dai long COVID-19. Sapos yu no save tingting long helt bilong yu, o yu hevi tumas, ol dispela bai daunim strong bilong bodi bilong yu. Sapos yu o memba bilong famili bilong yu i stap insait long dispela mak yu mas tingting strong long COVID-19 na lukautim yu yet na ol famili na komyuniti bilong yu long abrusim COVID-19,” Minista Kramer i tok.

Em i tok, werim pes mask olgeta taim, yusim marasin bilong wasim han na stap longwe long ples ol manmeri i bung long en.

“Sapos yumi wokbung wantaim na bihainim ol dispela lo, yumi ken lukautim ol sikmanmeri na pikinini na ol lapun long ol komyuniti bilong yumi,” Jastis Minista Kramer i tok.

Rebecca Negere i raitim