TUMORA Fraide 12 Mas em i pablik holide. Dispela long tingim dai bilong “Papa bilong Kantri” Gren Sif Sir Michael Thomas Somare. Kantri bai holim bikpela lotu long Sir Hubert Murray Stedium, Konedobu, Pot Mosbi long soim

las rispekt bilong em. Sir Michael i bin Gavana bilong Is Sepik Provins long 49 krismas tasol em i papa bilong kantri. Sir Michael i bringim Independens long kantri, Papua Niugini long 16 Septemba, 1975. Kantri i stap long bikpela wari long dispela taim. Ol arapela poroman kantri bi

long PNG tu olsem Australia, Nu Silan, ol Pasifik Ailan kantri, Indonesia, Saina, Japan, Amerika na Inglan i salim tu bel sori bilong ol i kam long PNG long dai bilong Gren Sif Sir Michael. Planti manmeri i tok Papua Niugini i lusim wanpela gutpela lida husat inap bungim kantri wantaim na tu strongim demokratik sistem bilong gavman inap long taim em i

 dai. Tasol salens i go tu long ol nupela lida long bihainim ol bilip na pasin em Sir Michael i bihainim bai kantri i ken divelop na stap gut. Long Sarere gavman bai kisim bodi bilong em i go long ples bilong em long Is Sepik na planim bodi bilong em. Taim bodi i kamap long Is Sepik, program bilong planim bodi bai stap long han bilong Is Sepik Provinsal

Gavman. Is Sepik Provinsal Gavman i plen long planim bodi bilong Sir Michael long Kreer Heights, long haus bilong Sir Michael yet, long Tunde 16 Mas, 2021. Bihain long dai bilong Sir Michael, gavman i bin makim tupela wik bilong stap sori. Em i hat long bodi bilong em i go long olgeta hap bilong kantri na olsem gavman i makim wan wan ol de long bilong ol provins i go na soim rispekt bilong ol long haus krai long Sir John Guise Indoor Spot Kompleks long Pot Mosbi. Dispela i program wan wan ol

provins i bin go na soim sori: Mande 1 Mas em ol lida na pipel bilong Motu Koita; Tunde 2 Mas em Sentral na Galp; Trinde 3 Mas; Milen Be, Noten na Westen; Fonde 4 Mas; Is Nu Briten, Wes Nu Briten na Nu Ailan; Fraide 5 Mas; Enga, Atonumus Rijon bilong Bogenvil na Manus, Sarere 6 Mas; Isten Hailans na Simbu; Sande 7 Mas; Westen Hailans na Jiwaka; Mande 8 Mas; Sauten Hailans na Hela; Tunde 9 Mas; Morobe na

Madang; Trinde 10 Mas; Is Sepik na Wes Sepik; Fonde 11 Mas; Palamen Kibung Fraide 12 Mas; Misa long Sir Hubert Murray Stedum; Sarere 13 Mas; Bodi long Haus bilong Famili long Pot Mosbi; na Sande 14 Mas; Gavman i kisim bodi i go long Wewak, Is Sepik long planim bodi bilong em. Mande 15 Mas; Is Sepik Provinsal Gavman i kisim bodi raunim Wewak taun; Tunde 16 Mas; Gavman bai planim bodi long Kreer Heights bihain long Misa.

Paul Zuvani i raitim