GREN Sif Sir Michael Somare i wanpela man bilong kamapim ol lida, Minista bilong Pablik Entaprais na Memba bilong Hagen William Duma i tok. Em i tok em yet i no bin save gut long wok tasol taim em i wok aninit long Sir Michael em i lainim planti samting long ‘Papa bilong Kantri.”

Em i mekim dispela tok long taim ol Westen Hailans i soim rispekt bilong ol long Sir Michael Somare Haus Krai long Pot Mosbi long Sande. “Mi wanpela minista i no gat ekspiriens tasol Sir Michael i soim na strongim mi long mekim wok,” Duma i tok taim em i tingim Petrolium ministri em i bin holim long taim bilong Somare gavman. “Long kamap Minista aninit long gavman bilong em, mipela i no save long rot LNG projek i save wok, Sir Michael i soim rot bilong wok na dispela i lukim projek i kamap.” Duma i tok Sir Michael i save givim taim long olgeta man, maski yu i bikpela o liklik man. “Dispela em pasin mipela olgeta lida i mas lainim na bihainim.” Em i tok i gat sampela ol memba husat i save painim pawa na kalap i go kam long ol pati tasol long Sir Michael em i no save painim pawa. Em i tok Sir Michael i save sanap strong long wanem tingting na bilip long em. “I no gat wanpela man inap bihainim lek mak bilong Sir Michael na kamap praim minista bilong tupela pati, pastaim long wanpela na bihain taim long narapela,” Duma i tok. “I no gat tupela Michael Somare, i gat wanpela tasol Sir Michael tasol na em i soim rot na kamapim olgeta samting. “Em i strongim tripela han bilong gavman em lijisleta (Palamen we i save mekim ol lo), eksekyutiv (Praim Minista na ol Minista bilong em we i save kamapim ol polisi) na judisari (han we i save strongim lo). “Tenkyu long wok na sevis Sir Michael i givim long Papua Niugini.” Duma i tok nau em i taim ol yangpela lida i mas luksave na bihainim ol lo na pasin bilong em. Em i tok Sir Michael i gat wanpela kain strong we long taim em, em i bin go egens long ol koloniel masta na kisim Independens bilong kantri. Em i tok Papua Niugini i gat planti tausen traib, kalsa na tok ples. “Mining bilong tok kantri em olsem kantri i gat wanpela tok ples olsem Inglan, Spain, Frans, Jemani na Itali. Tasol maski long dispela Sir Michael i bin inap long go pas long bungim kantri na kamap faunding papa bilong kantri. Em i tok tenkyu long Sir Michael long lidasip bilong em na long Ledi Veronica husat i bin givim gutpela sapot long em.