PALAMEN i holim spesel kibung tude. Dispela long lukim ol Memba bilong Palamen i soim las rispekt bilong ol long bodi bilong “Papa Bilong Kantri”

Gren Sif Sir Michael Somare. Spika bilong Palamen, Job Pomat i tok bihainim Seksen 124 bilong Mama Lo na Seksen 2(1)(a)(iii) bilong Oganik Lo long Singautim Palamen Kibung, em i raitim pas i go long Opis bilong Gavana Jeneral na i kisim tok orait long holim kibung long Fonde 11 Mas, 2021. Pomat i askim olgeta memba bilong palamen long kamap long dispela kibung. Sir Michael i wanpela man husat i bin wok politik planti yia, inap long 49 yia olgeta. Em i bin bringim kantri i go kisim

Independens long 16 Spetemba, 1975. Sir Michael i dai long Pot Mosbi long Fraide moning, 12:20 long 26 Februeri. Ol dokta i tok em i dai long sik “Pancreatic” kensa, sik long bel. Tude bodi bilong em bai stap long Palamen Haus. Tumora bai gat pablik holide na ol bai holim tu bikpela lotu long Sir Hubert Murray Stedium, Konedobu. Ol i holim lotu long dispela stedium bikos em dispela stedium we Sir Michael i daunim plak bilong Australia na putim plak bilong PNG i go antap long 1975. Ol arapela program bihainim dispela de em; long Sarere ol bai kisim bodi bilong Sir Michael i go long provins bilong em, Is Sepik. Gavman i bihainim las laik bilong

Sir Michael long kisim bodi bilong em i go long ples bilong em. Dispela i narakain long ol arapela memba husat i bin kamap praim minista we ol i planim bodi bilong ol long Indepedens Hil klostu long Palamen Haus. Long Sande Mas 14, bihain long Misa, ol bai planim bodi bilong Sir Michael long haus bilong em long Kreer Heights, Wewak. Stat long de Sir Michael i dai, kantri i wok long stap long 2-wik sori. Gavman i makim 26 Februeri olsem Pablik holide long tingim na amamasim dispela de long olgeta yia we Papa bilong Kantri i dai. Gavman i makim tu tumora olsem pablik holide we kantri bai soim las rispekt na holim wanpela lotu long Sir Hubert Murray Stedum long Pot Mosbi.