OL skul long Wewak i pas stat long asde Trinde na ol sios i stap sambai long kisim bodi bilong Gren Sif Sir Michael Somare long Sande dispela wik.

Ol skul i pas na ol klasrum i stap fri long ol pipel bilong Is na Wes Sepik na ol arapela provins husat i laik kamap long stap long las sori bilong Gren Sif.

Stat long las wik ol pipel i long Wewak taun na ol ples klostu i klinim ples na bilasim stedium we bikpela Misa bai i kamap.

Long dispela taim tu ol katolik i stap insait long tupela wik bilong prea na sori.

Long Sande ol i bin pre na mekim wanpela prosesio bilong kendel lait i go long Boys Town we Gren Sif Sir Michael yet i bin stap long opim wanpela grotto bilong Santu Maikel Arkensel wan nem bilong em.

Ol komyuniti tu i holim ol haus krai bilong ol wan wan na tingim wan wan stori bilong ol long hau dispela man, namba wan Praim Minista i gat taim long go long ol ples bilong ol na stori wantaim ol.

Ol pipel i redim paiawut na kaikai long sindaun long dispela haus krai. Ol meri i redim ol bilas bilong fiuneral na ol skul i redi long ma sol bai i mekim taim bodi bilong Gren Sif i kamap long Wewak.