LONG  Tunde Mas  9, 2021, ol famili, wanwok na pipel bilong Papua Niugini i bin tok gutbai long Dokta Paison Dakulala husat i bin dai long Mande, Mas 1, 2021. Long wankain taim kantri i stap long sori na krai long Gren Sif Sir Michael Somare husat i bin dai long wik i  go pinis.

Dokta Dakulala em i kamap deputi kontrola bilong COVID-19 Nesenel Pandemik taim dispela sik i kamap long PNG.

Mama i bin karim Dokta Dakulala long Ogas 8, 1959 long Esa’ala na em i namba tri pikinini long famili. Long 1968, Dokta Dakulala i bin statim skul bilong em long Alotau Praimeri Skul. Long 1976, em i go long Sogeri Nesenel hai skul. Long 1978, Dokta Dakulala i statim medikol skul bilong em long University bilong Papua Niugini.

Long Disemba 22, 1980, Dokta Dakulala i bungim na maritim meri bilong em Judith. Na tupela i gat 4-pela pikinini.

Namel long olgeta pipel husat i bin kamap long tok gutbai long Dokta Dakulala, Praim Minista James Marape, Helt Sekretri Dokta Osborne Liko, Polis Komisina David Manning, Helt Minista Jelta Wong, Ekseketiv Menesa bilong Medikal Standet Dokta Goa Tau tu i bin stap long givim tok sori bilong ol.

“Dokta Dakulala em wanpela gutpela man husat i save komitim em yet long God, wok na famili bilong em. Mi save long pasin bilong em taim mipela i stat wok wantaim long Nesenel Kontrol Senta long pait bilong daunim COVID-19 long kantri. Mi sanap makim kantri na tok sori long famili long dai bilong em,” PM James Marape i tok.

PM James Marape i pinisim tok sori bilong em wantaim hap tok “God i save givim na God i save kisim bek”.

Long taim ol i givim yuoloji bilong papa bilong ol, tupela pikinini, Sharon na Samuel Dakulala i tok papa bilong ol em gutpela man husat i save givim taim long ol pikinini bilong em maski em i bisi long wok bilong em.

“Dokta Dakulala em man husat i save daunim em yet na wokim gut wok bilong em. Em i save gat taim bilong olgeta lain husat i nidim em.  Em i bin wok na sevim provins bilong em yet, Alotau long yia 2000 i go inap 2008. Em i sempion bilong ol arapela wok bilong helt” Helt Sekretri Dokta Osborne Liko i tok.

Em i tok tenkyu long famili long laip bilong Dokta Dakulala.

Minista bilong Helt na HIV/AIDS, Jelta Wong i tok sori i go long famili na long wankain taim em i ritim tok sori i kam long UNICEF.

“Em i man husat i save andastenim ol arapela manmeri. Long taim mi wok wantaim Dokta Dakulala, mi lukim pasin bilong em olsem medikal profesinol em i gutpela tru, we ol arapela i mas lukim na bihainim. Maski em i gat hevi wantaim helt bilong em, Dokta Dakulala i komitim em yet long wok bilong em,” Polis Komisina David Manning i tok.

Bodi bilong em i lusim Pot Mosbi long Fonde moning na go long liklik ples bilong em long Esa’ala, long Milen Be provins long putim long graun.

Carolyne Ketsimur i raitim