SIR PETER Barter em wanpela gutpela pren tru bilong Gren Sif Sir Michael Somare na planti taim tupela yet i save sindaun dring kofi na stori i go kam long Haus Win long Madang Risot Hotel na lukluk i go olsem long Kranget ailan na kisim gutpela kolwin i kam long solwara bilong Bismark Sea.

Dispela frensip o poroman namel long Sir Peter na GrenSif Sir Michael i go bek longpela taim tru, taim Sir Peter i wok olsem wanpela pailot bilong liklik balus kampani, Talair long 1970s. Olsem na olgeta taim Gren Sif Sir Michael i save go long Madang oltaim Sir Peter Barter i save go bungim em na wokabaut raun wantaim em. Tupela i kamap olsem brata o femili stret.

Long Mande moning, Mas 1, 2021 Sir Peter Barter i sanap em wanpela na givim toktok long Laiwaden oval long Madang taun autim wanpela hait stori bilong Gren Sif Sir Michael Somare. Dispela hait toktok em Sir Peter Barter i tokaut fran long planti tausen yunivesiti na koles sumatin husat i bin bung bihain long wanpela ‘yuniti wokabaut’ .

Sir Peter i tokaut long pablik olsem em i amamas olsem Nesenel Eksekutiv Kaunsil (NEC) i bihain ‘Will’ bilong Gren Sif Sir Michael Somare long bringim bodi bilong gutpela pren bilong em i go long ples malolo long Kreer Heights long Wewak taun, Is Sepik provins na planim bodi bilong em. Sir Peter i tokaut olsem dispela hait toktok long ‘Will’ bilong Gren Sif Sir Michael Somare em i no tokaut long planti lain. Tupela yet save stori i go kam na wanpela taim Gren Sif Sir Michael yet i tokim em. Narapela strongpela Madang lida na pastaim gavana bilong provins, James Yali i bin tokaut tu olsem Gren Sif Sir Michael Somare em olsem papa bilong em, na pasin ‘kagin’ o ‘maror’ bilong Madang wantaim ol lain bratasusa long Karau na Murik Leik i save pas gut wantaim ol Madang pipel bilong Bogia na Ramu pipel stat long Kayan, Botbot, Gamai, Boroi, Awar na ol arapela ples long hap. Em i tok em i gat bikpela bel sore na wari long harim olsem Gren Sif Sir Michael i lusim laip bilong em long sik kensa. Mista Yali i tokaut tu olsem Gren Sif Sir Mi

chael i gat nem long wok tisa long Madang provins long Raikos, Transgogol long Barum na long Sumkar distrik we em i tis long Talidig na long Madang distrik em i tis long Kusbau praimeri skul.  Em i bin wok tisa sampela yia na bihain em i go wok olsem brodkasta wantaim Nesenel Brodkasting Komisin (NBC) long dispela taim we em i pasim tingting long go insait long wok politiks.

James G. Kila i raitim