LONG Mande em de bilong ol Hela na Sauten Hailans long go soim sori bilong ol long nesenel haus krai bilong Gren Sif Sir Michael Somare.

Dispela wokabaut i bin narakain long ol arapela wokabaut. Em i soim tru trupela pasin bilong dispela ol pipel. Ol i rabim graun long skin bilong ol, werim blakpela klos na siot, putim han antap long het bilong ol na ol i wokabaut isi na krai sori isi isi i go. Mak bilong ol manmeri i wokabaut em i abrusim 5,000 olgeta. Ol sumatin bilong Sauten Hailans long yunivesiti bilong Papua Niugini i stap long nek bilong dispela wokabaut wantaim bena bilong ol na olgeta pipel i bihainim. Long fran ol lida bilong ol long palamen i go pas. Ol i bringim planti presen na long dispela taim ol i soim bel sori tru bilong ol. Insait long haus krai long dispela taim tu ol lida bilong ol i kisim taim long tok sori long Gren Sif Sir Michael Somare, na ol pipel bilong Papua Niugini long ol pasin ol i mekim insait long politik bilong kantri.