Em i orait long ol yangpela i ken mekim planti samting long wanpela taim na ol i no ken bisi long wanpela samting tasol, bipo Miss PNG na Miss Pasifik Ailan 20192020, Leoshina Kariha i tok.

Tasol, em i tok, long mekim planti samting long wanpela taim ol yangpela i mas kamap fleksibol o lus lus. Taim ol i fleksibol ol inap long mekim wanpela samting na isi tasol surik i go na mekim narapela samting gen insait long wanpela taim tasol. Leoshina Kariha em i wanpela yangpela meri husat i bin mekim namba wan yia bilong en long Divine Word Yunivesiti long Madang long 2018 taim em i winim resis bilong Miss PNG. Bihain gen long 2019, em i makim PNG na i go resis long het bilas bilong Miss Pasifik Ailan na em i winim dispela resis tu. I no bin gat narapela resis bilong Miss Pasifik Ailan long 2020 bikos long COVID-19. Olsem na nau yet em i holim nem olsem Miss Pasifik Ailan i stap. Insait long ol dispela taim, Leoshina i save wok hat tru bikos em i sumatin na em i gat skul wok bilong en na tu em i patisipen bilong Miss Pasifik Ailan Pegen (MPIP) olsem na em i mas redi olgeta taim long ol resis we em bai mas winim. “Ol yangpela i no nid long bisi long wanpela samting tasol, ol i ken tingting long ranim wanpela bisnis na skul wantaim. Ol i mas

kamap fleksibol na mekim planti samting wantaim,” Leoshina i tok. Long las yia, 2020, em i winim wanpela skolasip long i go skul long Yunivesiti bilong Hawai, tasol bikos long COVID-19 na em i no bin i go. Em i bai skul long Yunivesiti bilong Hawai long dispela yia tasol em i bai stap long PNG na skul long intanet. I no longtaim i go pinis, Institute ov Business Studies (IBS) Kampani na grup bilong en i askim Leoshina long kamap bren embeseda bilong ol long karim nem bilong ol. Na Leoshina i wanbel. Taim Wantok Nius i askim em olsem wanem tru em bai mekim tupela bikpela wokmak em  i kisim long wanpela taim, em i bekim olsem, “Mi ken kamap olsem sumatin na givim taim na komitmen bilong mi long ol skul wok bilong mi na kisim mak bilong mi. Tasol mi laik long helpim ol arapela sumatin long wankain taim tu na taim mi pinis skul na greduet ol narapela yangpela tu i ken pinis skul na mipela olgeta i ken greduet wantaim.”

Rebecca Negere i raitim