NADZAB Intenesenel Ples Balus long Lae, Morobe Provins i kisim nem Michael Somare Intenesenel ples balus.

Morobe Gavana Ginson Saonu i tokaut long dispela taim ol lida na manmeri bilong Morobe Provins i soim rispekt bilong ol long Sir Michael Somare Haus Krai long Sir John Guise Indo Stedium long Pot Mosbi long Tunde.

Em i tok wantaim dispela Morobe Provinsal Gavman bai sanapim wanpela monumen long Lae long tingim Sir Michael. Em i tok mama i karim Sir Michael long Rabaul, Is Nu Briten na i gat save bilong Kuanua tok ples tasol em i kisim save bilong wok long Morobe. Em i tok long dispela, Sir Michael i bilong Morobe tu. Em i tok bikos long dispela save Sir Michael inap long bungim kantri wantaim. “Sir Michael i laikim yuniti long kantri, em i no laik bai wanpela rijon i bruk na i go bilong em,” Saonu i tok. “Em i lainim pasin bilong bungim ol manmeri, maski yu gat wankain tok ples na kalsa, ol i wanpela tasol.” Saonu i tok dispela em i lainim Morobe. Morobe Provinsal Gavman wantaim wan wan ol distrik insait long provins i givim K100,000 i go long famili bilong Sir Michael na Is Sepik Provinsal Gavman. Wankain olsem Madang Provins, Morobe Provinsal Gavman i salim bikpela lain delegesen i go long Wewak, I Sepik Provins long soim las rispekt bilong ol taim gavman i planim bodi bilong Sir Michael long Tunde 16 Mas, 2021.