LEIT Gren Sir Michael Somare ‘Papa bilong dispela kalaful Nesen’ Papua Niugini i bin statim Praimeri edukesen bilong em long Karau aninit long lidasip bilong Japan long taim bilong Wol Woa II we em i bin lainim rit, rait na kaun long tokples bilong Japan.

Mama bilong Sir Michael Somare Kambe Samare i bin karim em long Rabaul long 9 Epril, 1936 taim papa bilong em Ludwig Somare Sana bilong Is Sepik provins i bin wok olsem polis opisa long Rabaul. Namel long 1843 na 1943 Murik Lakes i bin meja beis bilong Japan na long taim em bin i gat 9-pela krimas, Somare i bin go long dispela

skul bilong ol Japan long tisim ol lokal pikinini long aritmetik na tokples bilon Japan. Long 1946 Sir Michael Somare i bin skul long Boram Praimeri skul na bihain go insait long Dregerhafen Edukesen skul na greduet wantaim Leaving o Tisa Setifiket bilong Australia State ov Victoria long Sogeri Hai Skul long 1957. Dispela i bin Tisa Setifiket long dispela taim, olsem na em bin wok tisa long sampela Praimeri na sekenderi skul. Long 1962 em bin go bek long Sogeri Hai long kisim moa trening long Pablik Sevis skolasip bilong Queensland Junior Setifiket kos  na long 1963 em bin kamap Asisten Eria Edukesen Opisa long Madang. Na long 1964 em bin lusim wok tisa

na kamap Brodkast Opisa wantaim Dipatmen bilong Infomesen na Ekstensen Sevis long Wewak. Na long 1965 em bin winim skolasip long go skul long Edministretiv Koles long Pot Mosbi. Long 1966 i go 1968 em bin wok Jenelis. Sir Michael i bin maritim Ledi Veronica Somare long 1965 bihain long em i pinisim skul long Edministretiv Koles. Sir Michael i bin kamap redio brodkasta beis long Wewak insait long Pablik Sekta long Is Sepik Provins. Em bin lusim Pablik Sevis long resis long ileksen long namba tu Haus bilong Asembli long 1968 olsem memba bilong Pangu Party we em bin kamapim wantaim ol arapela long 1967.

Jacklyn Kimala i raitim