VISION 2050 i gift o presen Gren Sif Sir Michael Somare i givim long ol pipel bilong Papua Niugini, Memba bilong Abau, Sir Puka Temu i tok Em i tok dispela gift i bilong lukim Papua Niugini i mas stap “smart, gat save, fea, helti na welti.”

Em i tok dispela plen i kamap bihain long taim em i bin stap Deputi Praim Minista aninit long Sir Michael na Gren Sif i bin sindaun wantaim em long Madang long 2008. Sir Puka i mekim dispela tok long las wik taim ol lida na manmeri bilong Sentral na Galp Provins i kisim taim bilong ol long soim sori bilong ol long haus krai bilong Sir Michael long Sir John Guise Indo Spot Kompleks long Pot Mosbi.

Asde nait i bin taim bilong ol lida na manmeri bilong Westen, Milen Be na Noten. Dispela nait bai taim bilong ol lida na manmeri bilong Nu Ailan, Is Nu Briten na Wes Nu Briten Provins long soim rispekt bilong ol. Sir Puka i tok sapos Sir Michael i laik lusim wok politik na i laik lukim kantri i kamap gut, orait em i mas lusim wanpela samting long strongim tingting bilong ol olsem PNG i stap gut. Sir Puka i askim Praim Minista James Marape na ol lida bilong bihain taim long ol i mas wok strong long lukim ol toktok bilong Vision 2050 i karim kaikai. Sir Puka i tok Gren Sir Sir Michael i wanpela “Giant of a man of a gaint of a heart” na dispela

i min Sir Michael i bikpela man husat i gat bikpela hat long luksave olgeta manmeri. Em i tok em i lainim planti samting long Sir Michael tasol wanpela samting we em i lukim em olsem Sir Michael olgeta taim i save tingting ol liklik manmeri, ol manmeri long ples. “Sir Michael i laik yumi mas tingim ol liklik manmeri na ‘roots’ bilong yumi, we yumi kam long em,” Sir Puka i tok. “Yumi ol lida i no ken lusim tingting long ol liklik manmeri. “Yumi lukim olsem ol i mas kisim kisim ol sevis ol i mas kisim na i gat gutpela sindaun.” Em i askim Praim Minista na ol lida olsem ol tu i mas tingim ol manmeri gut long ples taim ol i stap long ol bikpela opis.