EM  i stret long tok Sir Michael i Papa bilong Papua Niugini, pastaim Memba long Kandep Don Polye i tok.

Em i tok Sir Michael i bungim kantri wantaim, go pas long kisim Independens, kamapim Mama Lo, strongim ikonomi, kamapim ol lidaman na soim pasin bilong gutpela famili.

Polye i mekim dispela tok taim ol lida na manmeri bilong Enga Provins i soim rispekt bilong ol long Haus Krai bilong Sir Michael long Sir John Guise Stedium long Pot Mosbi long las wik Sarere.

“Em (Sir Michael) i kamapim Mama Lo, em i save kamapim ol lida, i bungim ol manmeri, i bihainim lo, i strongim ikonomi na soim pasin bilong strongim famili,” Polye i tok.

“Yumi mas amamas long ol wok na pasin em gat na soim long yumi.”

Em i tok Sir Michael i gat rispekt long ol samting em i kamapim olsem pablik sevis, Mama Lo, wok bung wantaim ol narapela kantri na olsem em i no save go bagarapim gen.

Polye i tok taim Sir Michael i no ranawe, pait bek, ol painim rot long pasim ol toktok taim Ombudsmen i kotim em.

Em i tok Gren Sif i sanap long sait taim Ombudsmen i kotim em na i go long kot.

Em i tok Sir Michael i kamapim Palamen.

“Palamen i pulap long ol lida Sir Michael i bin helpim long kamapim. “Palamen i wok Sir Michael i kamapim.

Polye i tok taim ikonomi i bin bagarap tru long 2002, Sir Michael i bungim ol yanpela lidaman olsem em yet (Polye) na ol arapela olsem Bart Philemon, Sir Moi Avei na Dokta Puka Temu long traim strongim ikonomi.

Ol arapela lida olsem Peter O’Neill (pastaim praim minista), William Duma na sampela moa em Sir Michael i helpim long kamapim.

Polye i tok Sir Somare i gat seven lidasip, olsem em i gat pasin bilong stap wokboi bilong ol manmeri.

Em i tok Sir Michael i no save subim tingting bilong em long ol arapela.

“Em i save bungim ol man na tokim ol long tingting bilong em sapos ol i wanbel o nogat.

“Somare em dispela kain lida. Mi laik bihainim pasin bilong em long stap olsem lidaman.

“Mi lainim planti samting long em na sampela ol dispela ol samting em long honesti, tok tru, tok stret, sanap strong egensim ol traim na ranim gut gavman.”

Em i tok wan wan ol lidaman i gat kain kwaliti olsem.

Polye i tok Sir Michael i wanpela strongpela Kristen man na i save lukautim gut famili bilong em.

Em i tok tenkyu long Ledi Veronica na famili long givim sapot long Sir Michael.