GAVMAN i makim Katolik Sios long go pas long lotu bilong tok gutbai long Gren Sir Michael Somare long Pot Mosbi.

Ol wok redi bilong dispela bikpela Misa i stat pinis. St Joseph’s Katolik sios long Pot Mosbi, we Gren Sif Sir Michael i save go lotu long en bai i go pas long dispela bikpela Misa.

Kardinel Asbisop sir John Ribat na 12-pela bisop na planti pris bilong sios bai i go pas long dispela Misa. Olgeta katolik komyuniti na peris long Pot Mosbi i stap sambai long go pas long dispela lotu. Moa long 500 Katolik yut tu i redi long helpim long taim bilong dispela bikpela Misa.

Hettok bilong dispela Misa em Wan Nesen, Wan Pipel bilong God.

Dispela Misa bai i stat long 1 klok long apinun na pinis long 5 klok long Fraide Mas 12, 2021 long Sir Hubert Murray Stedium long Kondedobu. Geit bai op long 11 klok. Bihain bodi bilong Gren Sif Sir Michael bai i go bek long fiunerel hom na long moning em bai i go long Wewak.

Ol I toksave tu long ol pipel i mas bihainim ol protocol bilong COVID-19. Long dispela de tu em i pablik holide.