BIKPELA piksa o pes we i stap long bikpela sain bot long ol pablik ples i save bringim kamap gat planti stori long en. Long Tok Inglis em planti taim sampela

i save tok olsem ‘A picture speaks a thousand words’. Dispela i min olsem wanpela piksa i gat planti stori long en na tu kainkain ol mining i stap long piksa Las wik Tunde wanpela grup ol i kolim ol yet  MAM o ‘Madang

Arts Maniac’  i droim piksa bilong Gren Sif Sir Michael Somaree. Lida bilong MAM, Robert Banasi i tok ol i droim ol piksa bilong Gren Sif Sir Michael Somare long onarim bikpela wok na lidasip bilong em long bringim kantri bilong

yumi kamap independen, na em papa tru bilong kantri na man i go pas long kamapim Konstitusen o Mama Lo bilong kantri bilong yumi. Tupela piksa bilong Gren Sif Somare i stap long dispela bikpela sainbot long

Bates oval namel long Madang taun, em  wanpela bikpela PMV stop bilong ol rurel pipel bilong Madang distrik long Transgogol, Bogia, Long Ailan, Kranget na tu Karkar pipel husat i save kisim lokal bot long hap..

Taim ol atis bilong MAM i bisi long peintim piksa bilong Gren Sif Somare long pablik sainbot, planti lain manmeri i sanap na lukluk long wok ol i mekim na salim tingting na sori long namba wan praim minister bilong PNG.

Dispela Bates oval em i gat planti histori long en na tu Gren Sif  Sir Michael Somare i bin save go mekim ol bikpela toktok long taim bilong selfgavman na taim em i kamap praim minista bilong Papua Niugini.

James G. Kila i raitim