Papua Niugini i mas hariapim ol wok bilong givim tok orait long COVID-19 veksin o sut marasin na i no ken westim taim na isi isi. Ol European Union (EU) i bin isi isi long givim tok orait long COVID-19 veksin na dispela i bin kamap long taim we planti keis bilong COVID-19 i bin kamap long kontinen.

Dispela i bin givim hatpela taim long ol saplaia na ol lain wokim COVID-19 veksin na tu i mekim ol populesen na ol memba kantri i bel hat i go long mak we ol i go painim veksin long narapela hap. Em bai moa gutpela sapos Nesenel Medesin Reguletori Atoriti (NMRA) i bin givim tok orait long ol veksin we Wol Helt Ogenaisesen i tok orait long stat bilong Februeri. Dispela em gutpela bikos WHO i gat ol risal bilong ol wokpainim i kamap long ol veksin prodak kain olsem AstraZenica veksin we ol i

wokim long India na Australia. Dispela veksin i no inap long nidim kol temperesa kain olsem ol veksin bilong MRNA i nidim. Na tu Covax i makim AstraZenica pinis long givim long PNG. Tasol dispela i no bin kamap. Sapos NMRA i bin givim tok orait kwiktaim bai namba wan sipmen bilong veksin i kamap na sampela progres bilong imunaisesen o banis sut i ken kamap pinis long pinis bilong Februeri na stat bilong mun Mas. Nau ol COVID-19 keis i wok long i go antap long NCD na ol sampela provins bai no inap long kamap sapos veksin i bin kam long kantri long Februeri yet maski liklik namba bilong test i givim liklik infomesen long spred bilong COVID-19 long kantri. Planti kantri long wol i nau yusim AstraZenica veksin bikos ol i lukim olsem em i wok gut long

banisim ol manmeri long COVID-19. Long dispela mak we kantri i nau stap long mak nogut bilong COVID-19, em i bikpela samting long NMRA i mas kamapim ol asesmen gut na kwiktaim na askim COVAX long salim ol veksin i kam na sipmen i noken westim taim. Ol i mas tok klia tu long olsem wanem bai ol pipel i kisim veksin. Long planti kantri ol i stat wantaim ol helt wokmanmeri na ol arapela manmeri na pikinini husat i stap long bikpela mak nogut na i kam daun olsem. Wan wan kantri i gat wan wan plen bilong ol yet long olsem wanem ol i bai karimaut veksinesen. Kain olsem  Indonesia i stat wantaim ol yangpela populesen bilong ol sumatin na wokmanmeri pastaim na ol arapela bihain long stopim bagarap long kamap long edukesen na ikonomi sistem bilong ol.