Carolyne Ketsimur i raitim LAS wik IRC i sainim Memorandum Ov Understanding (MOU)  wantaim Gulf Provinsal Edministresen bilong wokbung wantaim na kamapim gut revenyu koleksen we 60 pesen bilong guds na sevis takis bai go bek long sapotim provins long kisim sevis.

Komisina Jenerel bilong IRC, Sam Koim i tok tenkyu long Gavana bilong Galp Provins, Chris Haiveta long kamap long dispela bung. Em i tok planti nupela projek i wok long kamap nau long Galp na tu ol bisnis bai kamap planti. Olsem na IRC i mekim dispela muv long wok wantaim Galp long kisim takis we 60 pesen bai go bek long divelopim provins. IRC i stat pinis long mekim wok painimaut long ol bisnis we i wok long operet na bai kisim takis long ol. Gavana Haiveta i tok em i amamas long kam long dispela bung na sainim MoU. Em i longpela taim tumas, Provins bilong em i no kisim gutpela sevis. Bikos long dispela MoU saining, ol pipel bilong em long Galp bai kisim hap mani bilong takis na yusim long divelopim provins bilong ol. Em i tok tenkyu long IRC long mekim kamap dispela. I gat 2000 takispeia long Galp Provins. Takis mani bai kam long ol SME program long provins. “Mi amamas na lukluk i go pas long wokbung wantaim IRC long taim i kam” Gavana Haiveta i tok.