PASTAIM na laspela primia bilong Madang aninit long pastaim provinsal na lokal level gavman sistem, Andrew Ariako i salensim

ol lida bilong Morobe, Madang na Sepik (Momase) long bihainim Gren Sif Sir Michael Somare. Em i tok Sir Michael i wanpela lida bilong rijon we em i gat strong long kamap praim minista. Em i mekim dispela tok long asde nait taim ol Madang i soim rispekt bilong ol long Sir Michael Somare Haus Krai long Pot Mosbi long Sir John Guise Indo Stedium long Mosbi long Tunde. “Sir Michael i dai tasol husat bilong ol lida inap kisim ples bilong em na go pas long rijon,” Ariako i tok. “Em (Sir Michael) i kisim ol pasin bilong lidasip i go wantaim em. Husat nau inap kamap lida bilong rijon na inap kamap praim minista.” Ariako i tokaut long ekspiriens bilong em long 1992 taim Sir Michael i singautim em wantaim tupela arapela lida long rijon i go long opis bilong em, na i tokim ol olsem em i sori tru olsem strong bilong rijon i kamapim narapela praim

minista nau i lus. Em i tok long nau em i lukim tasol Gavana bilong Is Sepik Provins, Allan Bird, wanpela i wok long toktok strong tasol em i tok dispela i no inap. “Mi askim yupela ol yangpela lida bilong tude olsem yupela i mas wok bung wantaim olsem rijon i ken kamapim narapela praim minista.” Long wankain taim, Madang Gavana Peter Yama i tokaut olsem provins i komitim K1.2 milien long givim long famili bilong Sir Michael Somare na Is Sepik Provinsal Gavman. Long dispela K1.2 milien, wan wan 5-pela distrik olsem Bogia, Sumkar, Madang, Raikos, Midel Ramu na Usino Bundi i givim K100,000 na Madang Provinsal Gavman yet i givim K600,000. Dispela long tok tenkyu long wok Sir Michael i mekim long kantri na long helpim Is Sepik Provinsal Gavman long pinisim wok bilong planim bodi.