Ol manmeri na pikinini long olgeta hap long kantri i stap long sori na i soim dispela sori bilong ol insait long ol wan wan haus krai ol i sanapim long wanem hap ol i stap long en.

Wanpela ples klostu long hailens haiwe rot ol i kolim Mangiro long boda bilong Chuave Distrik ,Simbu Provins na Daulo Distrik Isten Hailans provins, i sanapim wanpela haus krai na i joinim kantri na i stap insait long sori. Dispela pasin we dispela viles i mekim em i wankain long planti viles long PNG long dispela taim bilong sori long dai bilong Gren Sif Sir Michael Somare.

Long Pot Mosbi siti, bikpela haus krai i stap long Sir John Guise Stedium long Waigani we ol wokmanmeri, ol sumatin, na ol manmeri husat i save stap long siti i go soim sori bilong ol long Gren Sif Sir Michael long dispela hap. 

Long dispela kain taim olsem long siti ol sampela man nogut i save laik long kisim dispela sans long bagarapim ol samting tasol long Pot Mosbi, dispela i no bin kamap. Komanda bilong Nesenel Kepital Distrik na Sentral Provins Divisen, Asisten Komisina bilong Polis (ACP) Anthony Wagambie Junior i tok strong long ol manmeri na pikinini i stap long Pot Mosbi siti na Sentral provins long givim rispek na kea insait long tupela wik bilong sori long stat na tu em i apim operesen bilong polis long dispela taim na i no bin gat bagarap long laip o propeti long dispela taim bilong sori.

Rebecca Negere i raitim