Dokta Theo Yasause, wanpela kalabus man long Bomana Koreksenel Institut i tok ol wan kalabus bilong en long olgeta haus kalabus long kantri i sori tru olsem Papa bilong Kantri Gren Sif Sir Michael Somare i dai. Ol i sanap wantaim kantri na i stap long sori long wanem hap long kantri ol i lok na i stap long en.

“Ol wan kalabus bilong mi na mi tu i sori na i stap long wari wantaim olgeta manmeri na piknini long kantri long dai bilong Papa bilong kantri Gren Sif Sir Michael Thomas Somare,” kalabus man, Dokta Theo Yasause i tok.

“OL haus kalabus long kantri i pulap wantaim ol manmeri bilong Papua Niugini long kain kain wok bilong laip, ol sampela i yangpela na sampela i lapun, sampela i gat bikpela save, sampela i gat liklik save na sampela i stap long namel. Tasol mipela i save kaikai na dring long wanpela sospen tasol na lukluk long wanpela na narapela na lukautim mipela yet.”

 “Mipela i save wanem em pasin bilong ol sitisen bilong Papua Niugini.”

“Mama Ledi Veronica na ol bratasusa Sana, Bertha, Arthur Dalcy na Junior, Sir Michael em i Papa tru bilong yupela tasol em i Papa bilong mipela tu na kain olsem yupela, mipela tu i pilim pen bilong lusim man we i stap klostu stret long lewa bilong mipela,” kalabus man Dokta Theo Yasause i tok.

Em i tok bipo long taim em i no bin go insait long kalabus yet, em i save wok wantaim Sir Michael olsem Sif ov Staf na edvaisa. Em i tok insait long ol toktok bilong Sir Michael em i save harim olsem i gat liklik risos na mani i stap long han bilong Sir Michael long em i laik bildim yunaitet Papua Niugini. Tasol Sir Michael i gat strongpela tingting olsem em bai lidim ol pipela long kamapim mani na risos na kamap sampela lain long wol.

Dokta Yasause i tok Sir Michael i bin stat wantaim K1,624,640  baset long dispela taim tasol nau kantri i gat baset bilong $6 bilien o K18 bilien.

“Yumi bin stat long nating. Nogat pailet, nogat loya, nogat dokta, nogat sivil enjinia, nogat saintis, nogat digri holda, nogat masta digri, nogat PhD lain tasol nau, i gat planti ol dispela lain na planti bilong ol em ol namba wan long wol.

“Long nating yumi kamapim planti samting. Driman bilong Sir Michael i karim kaikai na em i wok long i go bikpela long wan wan de na yia,” Dokta Yasause i tok.

Rebecca Negere i raitim