GREN Sif Sir Michael Somare i kamap long wanpela liklik ples ol i kolim Rapindik long bipo Rabaul ples balus long Epril 9, 1936.

Rapindik em i wanpela ples i stap long wanpela gutpela hap we ol turis na ol visita long ovasis i save laik long kam raun na lukluk i go olsem long hotspring o hat wara i save ron arere long volkenu Maunten Tavurvur klostu long Matupit Ailan long Rabaul Distrik, Is Nu Briten Provins. 

Mama bilong Sir Michael, Kambe Somare i karim em long dispela hap taim papa bilong en Saiden Ludwig Somare i go wok olsem polisman wantaim Niugini Polis bilong Germany long Rabaul. Ludwig em man long Karau viles long Murik Lake Distrik long Is Sepik Provins.

Taim Saiden Ludwig Somare na ol famili bilong en i go bek long Sepik em i lainim em yet long rit na rait na em i save toktok planti na strongim ol pipel long kamapim ol liklik bisnis. Em i kamapim Angoram Kopretiv Sosaiti na i kamap olsem siaman long 1961 i go inap 1967.

Saiden Ludwig em i gat foapela meri na 6-pela pikinini we Sir Michael em i namba wan pikinini bilong en. Maski Sir Michael i kamap long Rabaul em i gro long Sepik olsem na em i save holim strong ol pasin na kastom bilong Sepik.

Bubu bilong Saiden Ludwig, Sana, em i faunda bilong klen bilong ol long Sepik na em i lidaman bilong kamapim bel isi. Sir Michael i bihainim gut ol kastom na kalsa bilong en long Sepik olsem pikinini man long Sepik na em i kisim dispela nem bilong tumbuna bilong en Sana na strongim blutlain bilong papa bilong en.

Long nau kantri i lukim Sir Michael Thomas Somare, pikinini bilong Saiden Ludwig Somare Sana olsem namba wan papa bilong kantri na man husat i pulap long bel isi na i save laikim na strongim pasin bilong wokbung wantaim. Em i kamap dispela gutpela lidaman bikos long famili na komyuniti em i kam long en.

Rebecca Negere i raitim