GAVMAN long las wik i makim 26 Februeri olsem Pablik holide.

Em i bihainim dai bilong Gren Sif Sir Michael Somare husat i dai long Pot Mosbi long las wik Fraide.

Dispela long wanem Sir Michael i go pas long mekim Papua Niugini i fri na i go pas long lukim kantri i kisim Independens.

Bikos long dispela wok na ol arapela wok, kantri i luksave long em olsem Papa bilong Kantri.

Arere long gavman i makim dispela de, gavman bai kamapim wanpela menumen o mak long Independen Hill long tingim Sir Michael.

Gavman i no inap planim bodi bilong Sir Michael long Independen olsem em i save mekim long ol lida husat i kamap praim minista.

Em i bihainim laik bilong Gren Sif long planim bodi bilong em long Kreer Heights long Wewak long Is Sepik Provins.

Tasol wantaim dispela menumen, ol manmeri husat i go long Palamen Haus i ken lukim na tingim Sir Michael.

Gavman i tokaut tu olsem matmat bilong Sir Michael long Kreer Heights nau bai kam aninit long lukaut bilong Nesenel Gavman.

Gavman bai lukautim dispela matmat na bai mekim olsem wanpela ples bilong memori.

Bihain long dai bilong Sir Michael, gavman i makim tupela wik bilong stap sori.

Em i hat long bodi bilong em i go long olgeta hap bilong kantri na olsem gavman i makim wan wan ol de long ol provins i soim rispek bilong ol long haus krai long Sir John Guise Indoor Spot Kompleks long Pot Mosbi.

Dispela i program ol provins i go na soim sori:

• Mande 1 Mas em ol lida na pipel bilong Motu Koita;
• Tunde 2 Mas em Sentral na Galp;
• Trinde 3 Mas; Milen Be, Noten na Westen;
• Fonde 4 Mas; Is Nu Briten, Wes Nu Briten na Nu Ailan;
• Fraide 5 Mas; Enga, Atonumus Rijon bilong Bogenvil na Manus,
• Sarere 6 Mas; Isten Hailans na Simbu;
• Sande 7 Mas; Westen Hailans na Jiwaka;
• Mande 8 Mas; Sauten Hailans na Hela;
• Tunde 9 Mas; Morobe na Madang;
• Trinde 10 Mas; Is Sepik na Wes Sepik;
• Fonde 11 Mas; Palamen Kibung
• Fraide 12 Mas; Misa long Sir Hubert Murray Stedum;
• Sarere 13 Mas; Bodi long Haus bilong Famili long Pot Mosbi; na
• Mande 14 Mas; Gavman i kisim bodi i go long Wewak, Is Sepik long planim bodi bilong em.

Gavman i makim Fraide 12 Mas long kantri i bai kisim pablik holide.