BIPO long dai bilong em, namba wan Praim Minista bilong PNG, Sir Michael Somare i tokaut long laik bilong em long planim bodi bilong em long Is Sepik provins, na i no Indipendens hil long Pot Mosbi.

Long stetmen bilong famili, ol i tokaut klia long laik bilong Sir Michael long planim bodi bilong em long Kreer Heights long Wewak.

Dispela muv bai brukim olpela pasin bilong planim ol bipo Praim Minista bilong PNG long Independens Hil, we Sir Mekere Morauta husat i dai long Disemba 2020 i slip long hap nau.

Allan Bird, Gavana bilong Is Sepik i tok Sir Michael Somare i bin redim matmat bilong em yet pinis long Kreer Heights long Wewak.

“Long 2004, Sir Michael i stat long wokim matmat bilong em long Kreer Heights. Em i naispela eria tru. Na i lukluk i go daun long Wewak Haba. Sir Michael i save sindaun long dispela hap na lukluk long san i kam antap long moning,” Gavana Bird i tok.

Sir Michael Somare i bin olsem glu i holim pasim kantri bilong kainkain kalsa wantaim. Gavana Bird i bilip olsem dai bilong em i bungim gen kantri wantaim.

“Mi ting olsem, Sir Michael Somare i mekim dispela wis bilong bungim ol pipel bilong Sepik wantaim kantri,” Gavana Bird i tok.

Long taim Sir Michael Somare i dai, ples em i bikpela long en long Is Sepik i pasim olgeta bisnis haus na skul na soim rispek long papa bilong PNG.

Praim Minista na kebinet i rispektim dispela wis na bodi bilong Sir Michael bai i go bek long Is Sepik we em bai i slip na kisim malolo bilong oltaim.

Makim famili Arthur Somare i tok tenkyu long stet long harim wis na rispektim wis bilong Sir Michael.