MOA long 2000 yunivesiti na koles sumatin long Madang taun i bin bung wantaim na mekim wanpela ‘yuniti wokabaut’ o mas long Mande moning long Modilon rot long Madang taun long soim sore na rispekt long papa bilong kantri bilong yumi Gren Sif Sir Michael Somare.

Dispela ‘yuniti mas’ i makim namba wan de bilong soim sore na pablik holide long kantri we Praim Minista, James Marape i tokaut long en las wik long ol pipel i soim rispek long Gren Sif Sir Michael Somare, husat i bin dai long las wik Fraide moning, Februeri 26.

Ol sumatin bilong Divine Word University (DWU), Luteran Skul ov Nesing, na Madang Teknikol Koles i werim blak siot na klos na bung wantaim na wokabaut stat long  Laiwaden oval i go long Madang provinsal gavman.

Polis i go pas mekim rot i klia long ol sumatin i wokabaut long soim sore na rispek.

Ol ogenaisa bilong dispela ‘yuniti wokabaut’ i tok Gren Sif Sir Michael Somare em papa tru bilong Papua Niugini husat i sanap strong long bungim wantaim moa long 800 tok ples bilong dispela kantri long kamapim wanpela yunaitet kantri, Papua Niugini na bringim kantri long selp gavman na independens long 1975. Na ol sumatin i luksave na i soim bikpela sori na rispek.

Ol sumatin i toktok long laudspika na tok Gren Sif Sir Michael em i sempion tru long bungim ol lida na pipel bilong Hailans rijon, Niugini Ailans rijon, Sauten rijon na Momase rijon aninit long strongpela bilip bilong em long kamapim ‘Wanpela Pipel, Wanpela Kantri na Wanpela Nesen’. Olsem na dispela ‘yuniti mas’ long Madang i lukim ol sumatin bilong olgeta kona na provins bilong PNG i bung wantaim na holim han na wokabaut long soim sore na rispek long Papa bilong PNG, Sir Michael Somare.

Wanpela ‘’Haus Krai’ long soim rispek long GrenSif Sir Michael Somare em ol Sepik komyuniti long Madang taun i putim long Bilia mausrot . Wod kaunsila bilong wod 8 long Madang eben LLG, Saun Dambui i go pas long dispela haus krai.

Madang taun meya, Ismael Yama i mekim strongpela toktok long pablik olsem ol i no ken yusim dispela taim bilong sore long kamapim hevi na bagarapim wok bilong bisnis long Madang taun.

Mista Yama i tok Sir Michael Somare i bin stap strong long pasin bilong bung wantaim na bel isi na gutpela sindaun olsem na ol pipel i mas soim sore na rispek na stap isi na rispek long lo na oda.

Mista Yama i makim Madang taun long salim sore bilong em i go long famili bilong Sir Michael Somare na i tok sore long Lady Veronica na ol pikinini bilong tupela em Bertha, Sana, Arthur, Michael Junia na Dulcianna na tu ol tumbuna bilong ol.

James G. Kila i raitim