LONG Wewak taun long Mande 1 Mas ol pipel i bung long pos opis, ples we Sir Michael Somare yet bin stap na daunim plak bilong Australia long 1975 na putim bilong Papua Niugini i go antap.

Ol i sindaun long hap na harim toktok bilong dai bilong Gren Sif Sir Michael na soim sori bilong ol tu.

OL pipel bilong Perigo, ples arere long Boram ples balus i bin i go pas long dispela mas long  soim pasin sori long dai bilong Gren Sif, Papa, Sir Michael Thomas Somare.

Ol i bin bilas long blak klos, rabim graun, holim ol plawa na kolim olsem blak Mande na wokabaut . Olgeta komyuniti long Wewak olsem Boram CIS, Boram Mausrot, West Irian Kem, Eapot, Lain Kokonas, Friwei, Kreer ples, Chambri Kem,  Meni ples wantaim sapot bilong polis, difens, lokal sekyuriti kampani na ol lokal Smol Midium Entaprais.

Pastaim long ol i go long pos opis ol i go olsem long haus bilong Gren Sif Sir Michael na putim plawa na soim sori bilong ol.

Bihain ol i wokabaut i go long Sir Michael Somare Stedium, we Provinsal Edministreta Dokta Clement Malau i tok klia long ol pipel bilong Is Sepik long stap long wan wan sel haus bilong ol yet long komyuniti bilong ol yet.

Dokta Malau i mekim dispela toktok bihainim sik COVID-19. Na i tok strong long olgeta i mas stap long ples long gutpela bilong abrusm dispela sik.

Malau i tok, bodi bilong Gren Sif Somare bai kam long ples na wok bilong matmat bilong em i stat pinis long Kreer Heights. Planti bai gat sans long lukim long televisen na harim long redio long ol wok bilong planim bodi bilong Gren Sif Somare.

Long wankain taim tu ol pipel bilong Angoram, asples bilong Gren Sif i sanap long dispela de long soim bel wari bilong ol long wokabaut raunim Angoram long dispela wik Mande.

Bikpela lain stap long dispela blak Mande de long distrik em ol Biwat, Keram, Karawari, Yuat, Marienberg na Angoram bin stap insait long dispela Mas.

Jonathan Poema i raitim