... tok gutbai long Palamen

GREN Sif Sir Michael Somare long taim em i bin stap yet i bin tok strong long yuniti.

Em i laikim bai ol pipel i mas bung wantaim na kantri i mas stap wanpela.

Em i mekim dispela tok long ol memba bilong palamen long palamen haus long taim em i risain long wok politik long 2017.

Sir Michael i tok gavman i mas wok long bringim yuniti long kantri.

Em i askim ol long bihainim Wes Minista Sistem long strongim demokrasi.

Em i tok planti senis i kamap pinis we em i hop long 100 yia taim Papua Niugini bai luksave olsem em i independen kantri.

Em i kamapim Pangu Pati wantaim ol man olsem Sir Albert Maori Kiki na Sir Dokta Ruben Taureka, Sir Peter Lus, Sir Julius Chan wantaim ol arapela lida long mekim kantri i kamap wanpela.

Long dispela as ol i kamapim Buli Bif klab. Long Buli Bif klab ol i kamap wantaim ol tingting long kisim Independens.

Em i tok gavman i ken yusim opis bilong Ogenik Lo bilong Integriti bilong Politikal Pati na Kendidet (OLIPPAC) long divelopim stronpela politikel sistem.

Em i tok kantri i mas i gat tupela o tripela pati tasol na i no long 44 pati olsem em i gat long dispela taim.

Em i tok liklik namba bai bringim politikel stabiliti long gavman na givim bilip long ol investa long kam insait.

Sir Michael i bin mekim dispela tok long Palamen long ol memba long tok gutbai long em.

“Long taim mi go aut, mi bin gat sans long wok olsem memba bilong Is Sepik long olgeta Nesenel Palamen i kam inap nau,” Sir Michael i tok.

“Mipela i gat planti traib, ol klen, ol tok ples na kalsa na olsem mipela i mas i gat ol polisi we i mas promotim dispela sindaun na bringim yuniti, olsem nem Pangu pati i sanap long em, Papua na Niugini Yunaited.

“Mipela i mas stap wan nesen na wan kantri.

“Mi laikim ol investa i mas kambek long dispela kantri na invest.

 “Yupela i mas gat nesenel na intanesenel tingting.

Sir Michael i tok em i bungim ol salens na lukim ol manmeri i kisim sevis na i rispektim pablik sevis.

Long pasin bilong stap lida, Sir Michael i tok em i stat wantaim tingting long kamap wokman.

Em i askim ol Memba olsem ol tu i  mas kamap wokman bilong ol manmeri.

“Mi bin gat taim long save olsem mi gat pawa na mi save bikpela wok i stap long han bilong mi tu.

“Taim mipela i holim Baibel long Gavman Haus o sanap long Palamen na mekim tok promis, mipela i promis long kamap sevan bilong ol pipel.”

Sir Michael i askim ol lida long bihainim wankain rot olsem kantri i ken ran gut.