Sentral Provinsal Gavman i sutim tok long Nesenel Kapital Distrik Komisin (NCDC) long senisim takis lo long kisim mani i kam insait long provins.

Sentral Provinsal Gavana Robert Agarobe i tok NCDC i mas peim moa long 30 pesen long brukim lo bilong kisim dispela ol mani o inkam revenyu.

Tasol pastaim long dispela ol toktok bilong Sentral Gavana, Nesenel Kapital Distrik Gavana Powes Parkop i bin mekim wanpela stetmen olsem dispela investmen bai inap apim revenyu.

“Yumi nau i nogat bisnis investmen insait long siti long kisim mani na givim sevis long ol pipel.

“Olgeta provinsal gavman i gat investmen tasol mipela nogat,” em i tok.

“Olgeta mani bilong mipela i save kam long mani mak olsem K340 milien na dispela mani i save kam long guds na sevises takis (GST) insait long Intenel Revenyu Komisin (IRC). Mipela tu i gat ol narapela revenyu olsem graun reit na klinim rabis long siti tasol 90 pesen bilong ol revenyu i bilong GST,” Parkop i tok.

Tasol Agarobe i tokim niusman olsem siti atoriti i giaman long senisim tras dits (trust deeds) long peim mani aninit long GST i go long Sentral Provins.

Sentral Gavana i tok ol i senisim tras dits we NCDC i save kontribiutim 10 pesen GST, we ol (NCDC) sapos long peim 30 pesen.

Agarobe i tok moa olsem kontribiusen bilong NCDC i luk olsem samting nating long nesenel kapital distrik na dispela tingting inap kamap olsem edministresen isu.

“Mipela i no save kisim 10 pesen olsem lo i tok long tras dits long NCDC i mas kontribiut i go long Sentral Provins.

“Bilong wanem bai ol i kontribiut i kam long mipela, ‘mipela i no pikinini’ mipela em gavman? Ol i mas peim wankain olsem Ekt (Act) i tok,” em i tok.

Em i tok dispela Ekt i stap long sistem na em i hat tru long senisim na wanpela gavana i no bin senisim.

“Ol pipel bilong Sentral provins i makim mi long tok orait long senisim ol samting long kamapim gutpela singdaun bilong ol,” em i tok.

 Joseph Dawai i raitim