Wanpela Non Gavaman Ogenaisesen, Foundation Of Women In Agriculture Development (FOWIAD) long Maprik, Is Sepik Provins i namba wan grup long sainim Leta Ov Agrimen (LOA) wantaim FAO STREIT PNG program long wok bilong Agrikalsa, long las mun.

Ekseketiv Dairekta bilong FOWIAD Monica Jeddah Otto I tok tenkyu long Europian Union (EU), Food and Agrculture Organisation (FAO) na Sapot Long Rurel Bisnis, Invesmen Na Trade (STREIT) long dispela luksave na bilip ol i gat long FOWIAD.

Misis Otto i tok ol NGO na koperetiv i mas wok bung wantaim long strongim dispela wok.

"Mi gat bikpela luksave long wok bilong ol meri long las 25 yia long wok wantaim ol meri na yut long wok Egrikalsa, long kakao, kokona, pis na daun strim prosesing bilong vejin Kokonas wel," Misis Otto i tok.

Em i tok moa olsem wantaim ol kainkain salens ol meri i save bungim, mipela olgeta i mas luksave long veliu mipela i gat na mipela olgeta manmeri wantaim i gat na yumi wok bung na kamapim risal.

"Mi nau singaut long ol yut, ol meri na ol man, ol gavman opis na olgeta long holim han na wok wantaim,” Misis Otto i tok.

 Em i tok tenkyu tu long bikpela luksave bilong Is Sepik Provinsal Dipatmen bilong Egrikalsa na Laipstok long K50 tausen helpim mani long ol sampela yia na tu Is Sepik Provinsal gavman aninit long lidasip bilong Gren Sif Sir Michael Somare long helpim wantaim K200, we FOWIAD i putim long divelopim Boikin FOWIAD Senta long Wes Kos, Wewak.

Em i tok moa olsem bihainim dispela LOA,  FOWIAD na FAO STREIT, bai lukluk long wok wantaim klostu 4-pela ples long Maprik na Wosera Gawi  em ol namba wan lain long Woura na Hayfield  (Maprik), Burui na Miko long wok bilong kakao.

Jonathan Poema i raitim