OPIS bilong PNG Ilektoral Komisin (EC) i tok wok bilong kaunim gen Kandep ileksen vot bai go het bihain long em i kisim tok orait long Suprim Kot long Tunde long surukim de bilong kaun.

Suprim Kot i givim oda long EC i mas pinisim wok bilong kaunim ol vot bipo long 31 Mas.

Pastaim oda bilong kaun i mas pinis em long las wik Fraide 26 Februeri.

Tasol bikos Kandep Memba, Alfred Manasseh i bin kisim Slip rul aplikesen long kot dispela i pulim taim bilong kaun.

Kaun nau i ken go het.

Wok bilong kaun i kamap long Kundiawa long Simbu Provins.

Dispela oda i kamap bihain long pastaim memba bilong Kandep, Don Polye i kisim Manaseh i go long Kot-bilong-Dispiutet Riten olsem wok bilong kaun pastaim i no bin stret.

Dispela i mekim Kot i givim oda long komisin i kaunim gen ol vot.

Ekting Ilektoral Komisina Simon Sinai i tok opis bilong em i kisim tasol K5 milien na i no K6 milien we opis bilong em bin i askim long en.

Sinai i tok i gat gutpela sekyuriti long lukautim ol balot pepa long taim kaun i kamap na long ol pepa i stap long Kundiawa Polis Stesin.

Em i tok Hailans Rijonal Polis Komanda, Joseph Tondop i strongim tingting bilong em olsem polis i redi long pasim kain kain hevi sapos ol i kamap.

Reveren Tom Sine i go pas olsem Ritening Opisa na Westen Hailans Ileksen Menesa Philip Telape na Simbu Ileksen Menesa Antonia Nilkare i stap olsem ol asisten ileksen ritening opisa.