BIHAININ ol kempein bilong tok nogat long sand maining long Not Kos Madang Provins, man i go pas long kempein Wencelaus Magun i kisim wanpela pas i toksave long em olsem Niugini Sands Maining i no inap go het moa long mekim kamap dispela wok.

Dispela em pas i kam long Patrick Monouluk, Deputi Rejistra bilong Mineral Risos Atoriti.

Monouluk i tok klia olsem, Niugini Sands Limited i rausim pinis eplikesin bilong em long karimaut wok bilong EL 2664 long mainim wesan long Madang Provins.

Papa billong kampani long Singapore i skelim gut posisen bilong em long eplikesen na i wanbel long rausim bikos long ol veliu na sosol responsibiliti bilong en.

Dispela toksave i kam bihain long wanpela kot eplikesen Sir Arnold Amet bipo jas husat i makim ol pipel bilong e mi bin mekim long pinis bilong las yia.

Mista Magun i tok tenkyu tru long ol lain husat i bin sanap na pait strong long tok nogat long dispela maining.

Ol pipel i ken amamas na go het long lukautim ples bilong ol na kisim kaikai long bus na solwara.

Mista Magun em i go pas long wok bilong lukautim ol trausel bilong solwara long hap bilong em we dispela maining kampani i laik wok long en.