PLANTI manmeri i salim tok sori bilong ol long dai bilong Papa bilong kantri, Gren Sif Sir Michael Somare.

Namel long ol em Praim Minista James Marape husat i tok kantri i lusim lida we no gat wanpela lida long Papua Niugini inap kisim ples bilong em.

Em i tok nem bilong Gren Sir Sir Michael Somare bai i stap olsem long ol yia i kam.

Em i tok Sir Michael i wanpela gutpela na trupela lida em kantri i bin i gat long em.

Em i harim na bihainim askim bilong Sir Michael long planim bodi bilong em long Kreer Heights long Wewak, Is Sepik Provins.

Dispela i no bihainim pasin em palamen i bin bihainim long planim bodi bilong ol lida husat i kamap praim minista long Independen Hil, klostu long Palamen Haus.

Oposisen lida, Belden Namah, i salim tu tok sori bilong em.

Oposisen lida Belden Namah i tok kantri i tingim Gren Sif Sir Michael Somare na Sana.

Em i tok gutbai long Sana bilong Murik Leks, long Ledi Veronica na papa bilong Sana, Arthur, Betha, Dulcie, Jnr Michael na 8 milien manmeri bilong Papua Niugini.

Mista Namah i tok Gren Sif i wanpela daun pasin man bilong God, husat i pas na stap strong wantaim famili, moa yet long kantri em i kamapim, Papua Niugini.

Em i tok God i makim em na em i lusim kantri olsem em i bin kamapim long em; yunaitet na kantri i bilip long God.

Sir Julius Chan husat i bin statim wok politik long wankain taim olsem Sir Michael long 1968 i tok em i sori tru long harim dai bilong longtaim pren bilong em.

“Mi salim tok sori bilong mi Ledi Veronica wantaim faivpela pikinini; Betha, Sana, Arthur, Dulicie na Jnr Michael,” Sir Julius i tok.

“Sir Michael i wanpela long ol man husat i gat daunpasin na em i gat dispela presen bilong lidasip i stap wantaim em.

“Wantaim dispela strong, Sir Michael i bin inap long go pas long ol lida na bringim Independen long kantri.”

Sir Julius i tok Sir Michael i laikim yuniti long kantri.

Em i tok sapos kantri bai lus sapos Nugini i go bilong em yet, Papua bilong em na Bogenvil i go bilong em yet.

“Mipela i laikim mipela yet long stap wanpela,” Sir Julius i tok.

“Mipela bai i no gat strong taim mipela i bruk.”

Em i tok kantri bai i no inap stap wankain olsem Sir Michael i bin go pas na wok hat long kamapim.