KATOLIK Bisop Konprens (CBC) bilong Papua Niugini na Solomon Ailan i salim tok sori bilong em i go long dai bilong Sir Michael Somare.

Opis bilong CBC i tok ol memba bilong CBC i sori long harim dai bilong Sir Michael.

Em it ok Sir Michael i wanpela gutpela wokman bilong God, sios na kantri.

Em i tok Sir Michael i kamap long gutpela Katolik famili aninit lukaut bilong ol Divine Word Misineri (SVD) long provins bilong em long Is Sepik.

Em i pren tru bilong Asbisop Leo Arkfeld, SVD.

Oltaim em i save go lotu long St Jospeh Peris long Is Boroko, Pot Mosbi maski sapos em i stap praim minista o stap memba nating.

Em i bin stap gutpela poroman bilong CBC tu.

CBC i tok Sir Michael i soim gutpela pasin bilong marit na famili laip.

Em i tok Sir Michael i kamap praim minista na kamap olsem Papa bilong Kantri na i bin stap gutpela man bilong Ledi Veronica na papa bilong ol pikinini na ol bubu bilong em.

Em i bin wok politik long 49 krismas olgeta stat long taim em i makim ol pipel bilong em, Is Sepik na kamap memba bilong Haus ov Asembli long 1968.

CBC i makim maus bilong olgeta bisop bilong Papua Niugini na Solomon Ailan na kantri wantaim na salim tok sori bilong em i go long Ledi Veronica wantaim ol pikinini na ol bubu.

Em i pre olsem sol bilong Sir Michael i ken kisim bel isi long ples bilong bel isi.