POLIS Komisina David Manning i strongim disisen em i mekim long trensfeim ol sinia polis opisa i no long taim i go pinis.

Em i tok em i mekim dispela disisen long gutpela bilong Konstabulari na kantri na tu em i tok ol dispela i stap aninit long pawa bilong en olsem Komisina bilong Polis.

Mista Manning i mekim ol dispela toktok bihainim ol ripot i kam long ol midia olsem 6-pela polis opisa i kisim Polis Komisina i go long Kot bikos long ol daireksen em i bin givim.

Mista Manning i tok, Polis Komisina i gat pawa long givim daireksen long ol opisa long wokim kriminol wokpainim, aplai long tok orait bilong holim man, sasim man na salim ol memba bilong polis fos i go long olgeta hap bilong konstabulari na kantri.  

 Em i tok long 2014, Suprim Kot i skelim pinis ol hevi bilong lo wantaim ol pawa bilong komisina na tu long sait bilong arest warent o tok orait bilong holim man na sasim man.

“Jastis David Cannings, husat i mekim fainel disisen makim maus bilong Jastis Colin Makail, Jastis Don Sawong, Justice Goodwin Poole na Jastis Lawrence Kangwia, i tok long dispela taim olsem bikpela pawa bilong koman na namba wan wokmak bilong kontrolim operesen bilong polis i stap long han bilong Komisina bilong Polis.

“Sapos ol opisa i ran i go long kot olgeta taim wanpela daireksen bilong trensfea i kamap bai no gat wanpela samting i kamap. Dispela em i disaplineri ogenaisesen we i mas i gat koman na kontrol na wanpela polis komisina tasol. Sapos ol opisa bai no inap long bihainim ol daireksen i kam long komisina ol i mas tingting strong gen long wok bilong ol wantaim Polis Fos.

“Komisina bilong Polis i save givim ol daireksen bilong trensfea long wan wan taim bihain long em  i toktok wantaim tupela deputi polis komisina na taim i gat nid em i save toktok tu wantaim ol divisen asistent komisina. Dispela i bin kamap long las taim bipo long Polis Komisina i givim daireksen bilong trensfea long ol opisa na dispela i kamap long gutpela menesmen bilong konstabulari,” Mista Manning i tok.

Mista Manning i tok, long keis bilong 6-pela opisa, wanpela i rausim keis bilong en na i kisim wokmak olsem Provins Polis Komanda bilong Morobe. Ol arapela 5-pela i lukim wanpela lo bilong kontrak i abrus na dispela i kamap as bilong kot keis bilong ol.

Maski ol senis i kamap long ol posting bilong ol opisa, ol i no inap lusim wanpela samting. Em i tok, ol dispela 5-pela opisa em ol yunifom opisa na ol i go het long kisim wankain pe ol i save kisim.

“Tasol nau mi lukim olsem ol dispela 5-pela opisa i abrusim krismas bilong ritaia pinis na ol i mas ritaia nau tasol. Menesmen bilong mi bai lukluk gen long ol daireksen mi givim long transfea na stretim ol dispela faivpela opisa long ritaia,” Mista Manning i tok.