OL pipel bilong West Nu Briten Provins i mas strongim gutpela pasin ol i bin mekim insait long taim bilong 14-de lokdaun we i karim kaikai bilong daunim COVID-19 long i go i kam long provins.

Komisina bilong Polis na Kontrola bilong PNG COVID-19 Nesenel Pandemik Rispons, David Manning i mekim dispela tok bikos em i lukim olsem insait long dispela tupela wik lokdaun namba bilong ol COVID-19 keis long provins i go daun tru, i no olsem long Disemba 2020 na Jenueri long dispela yia we namba i go antap tru na i mekim Kontrola Manning long givim oda long lokdaun.

Em i tok maski planti manmeri na pikinini i no laik long go insait long lokdaun, lokdaun i mekim na planti bilong ol i no kisim COVID-19. Na tu, em i tok, maski lokdaun i bin pinis long stat bilong mun Frebrueri, Kontrola Manning i tok pait bilong daunim COVID-19 i no pinis yet olsem na em i strongim ol WNB long strongim ol pasin ol i bin mekim insait long lokdaun.

“Mipela i amamas olsem WNB i nogat planti nupela keis olsem long sampela mun i bin go pinis. Bihain long lokdaun, moa long tupela wik i bin abrus pastaim long ol i ripotim ol nupela keis gen olsem na mi laik strongim ol long holim strong ol gutpela pasin ol i mekim insait long lokdaun.

“Wankain olsem ol arapela provins, WNB i bin pret na i stap isi taim namba bilong COVID-19 keis long provins i go antap bikos long bikpela komyuniti trensmisen, mipela i no gat narapela rot olsem na mipela i tokaut long lokdaun, we mi save olsem ol pipel i no bin laikim.

“Mi laik strongim olgeta sitisen na ol lain i stap insait long provins long bihainim ol lo bilong helt olsem wasim han, werim pes mask long ol pablik ples na stap longwe long arapela long stopim sik long i go i kam.

“I gat ol arapela provins we i ripotim ol COVID-19 keis we i kam long WNB olsem Madang provins. Dispela em i ken skulim olgeta provins long PNG long opim ai na stap bikos COVID-19 i wok long  i go i kam kwiktaim long olgeta hap taim ol manmeri i pasim ai na ting olsem em i fani,” Kontrola Manning i tok.