KOMISINA bilong Polis, David Manning i tok sori long Lady Veronica Somare na ol piknini na bubu bilong Sir Michael Somare husat i dai long las wik Fraide long Pacific International Haus Sik (PIH).

“Makim maus bilong famili bilong mi na ol memba bilong Royal Papua Niugini Konstabulari, mi tok bikpela sori tru long Lady Veronica, ol pikinini na bubu. Gren Sif em i pikinini man bilong wanpela polis man, Saiden Ludwig Somare, husat i wok olsem polisman long 1922 i go inap 1947.

“Olgeta taim, mipela i save lukim ol Somare olsem ol memba bilong bikpela polis famili. Mipela bai honarim na amamasim Gren Sif olgeta taim,” Komisina Manning i tok.

Em i tok, Gren Sif Sir Michael Somare em i bikpela sempion bilong bel isi na pasin bilong bung wantaim. Komisina Manning i laik olgeta manmeri na pikinini i mas bung wantaim na sori long dai bilong en.

Bihain long David Manning i harim olsem Sir Michael i dai long bikpela moning tru long las wik Fride, em i putim olgeta polis long kantri long mekim wok na stopim ol manmeri husat i bai laik long kisim dispela sans long kamapim pret na guria.

Em i mekim dispela pasin long honarim dai bilong Gren Sif Sir Michael na em i laik olgeta manmeri na pikinini long kantri i mas sori long dai bilong Sir Michael wantaim bel isi.

Sampela ol manmeri na pikinini long komyuniti i no bin laik long muv raun long dispela de bikos ol i ting olsem sampela pasin olsem brukim stoa na kukim bilding na haus nambaut bai kamap long las wik Fraide.

“Gren Sif Sir Michael i gat strongpela tingting long pasin bilong bungim olgeta tausen traib bilong dispela nesen na em i bin givim laip bilong en long dispela. Em i bin sanap strong bilong kantri na egensim ol masta bilong koloni na tu wol we i pulap long pasin bilong skelim kala skin bilong man, lustingitng long narapela na les long narapela na em i bin givim laip bilong en long bungim dispela kantri na mekim em kamap kantri bilong en yet.

“Gren Sif Sir Michael i sanap wantaim PNG long 46 krismas long mekim PNG i kamap strongpela na fri kantri we yumi olgeta i ken pilim amamas long en,” Komisina Manning i tok.